Türk Dünyası Araşdırmalar Vəqfi Bakı Atatürk Liseyi
2019-2020-ci tədris ili üçün birinci siniflərə qəbul elan edir.
Liseydən verilən məlumata görə, sənəd qəbulu may ayının 4-nə
qədər davam edəcək.
May ayının 11-də isə liseydə təhsil almaq istəyən uşaqlar üçün zəka testi imtahanı
keçiriləcək. İmtahanda ən yüksək nəticə göstərən uşaqlar liseyin birinci sinfinə
qəbul olunacaqlar.
Xatırladaq ki, Bakı Atatürk Liseyi 27 il bundan öncə,
1992-ci ildə Türk Dünyası Araşdırmalar Vəqfinin qurucusu, mərhum professor
Turan Yazqan tərəfindən açılıb.
Lisey fəaliyyət göstərdiyi müddətdə minlərlə məzun verib. Hər
il liseyin məzunlarının azı yüzdə 98 faizi Azərbaycanın, Türkiyənin, həmçinin
dünyanın nüfuzlu ali məktəblərinə qəbul olunurlar.
Liseydə Türkiyə Cümhuriyyətinin Milli Təhsil Nazirliyinin tədris
plan proqramı ilə Azərbaycan Təhsil Nazirliyinin tədris plan proqramı birləşdirilərək
təlim-tərbiyə aparılır. Liseydə təhsil iki növbəlidir. 1-4-cü siniflər
günortadan sonra, 5-11-ci siniflər isə səhər növbəsində oxuyur.
Liseydə fizik-kimya-biologiya laboratoriyaları, zəngin
kitabxana mövcuddur. 1-4-cü siniflərdə dərsləri Türkiyədən gəlmiş müəllimlər tədris
edir. İlk dörd sinifdə Türkiyə Milli Təhsil Nazirliyinin dərslikləri və tədris
proqramı tətbiq edilir.
Bununla yanaşı, ilk dörd sinifdə Azərbaycan dili, ingilis
dili və kompüter dərsləri də keçirilir. 5-11-ci siniflərdə başlıca olaraq Azərbaycan
Təhsil Nazirliyinin dərslikləri və tədris plan proqramını tətbiq edilir. Ancaq
5-11-ci siniflərdə, həmçinin Türkiyə Milli Təhsil Nazirliyinin proqramına əsasən
Türk dili fənni də tədris olunur. Türkiyə türkcəsində keçirilən dərslərin kitabları
şagirdlərə lisey tərəfindən pulsuz verilir.
Xəbərdən istifadə edərkən istinad etmək vacibdir.
