Sumqayıt şəhər 9 nömrəli orta ümumtəhsil məktəbinin binası sökülüb.
Xeberle.com-un məlumatına görə, şəhərin İnşaatçılar qəsəbəsində yerləşən və qəzalı vəziyyətdə olan orta ümumtəhsil məktəbinin binası sökülərək yerində müasir tələblərə cavab verən yeni bina tikilir.
Məktəbin kollektivi isə müvəqqəti olaraq keçmiş "İstək" liseyinin binasına köçürülüb və tədris prosesi orada davam etdirilir.
Yeni məktəb binası 1176 şagird yerlik və 4 mərtəbəli olacaq. Tikinti işlərinin sentyabr ayına kimi başa çatdırılması nəzərdə tutulur.
Xatırladaq ki, ötən ilin noyabr ayında Prezident İlham Əliyevin sərəncamı ilə Sumqayıt şəhərində 1176 şagird yerlik yeni ümumtəhsil məktəbi binasının tikintisi məqsədilə Azərbaycan Respublikasının 2018-ci il dövlət büdcəsində nəzərdə tutulmuş Prezidentin ehtiyat fondundan Təhsil Nazirliyinə ilkin olaraq 1 milyon manat ayrılıb.
Xədicə Səxavətqızı
Xəbərdən istifadə edərkən istinad etmək vacibdir.
