Sumqayıtda yerləşən Qubadlı rayon 1 saylı tam orta məktəbdə narkotik vasitələrin qanunsuz dövriyyəsinin fəsadları barədə maarifləndirici tədbir keçirilib.
Daxili İşlər Nazirliyinin mətbuat xidmətindən Xeberle.com-a bildirilib ki, Qubadlı Rayon Polis Şöbəsinin təşkilatçılığı ilə keçirilən tədbirdə rayon polis şöbəsinin əməkdaşları ilə yanaşı, müvafiq icra hakimiyyətinin səlahiyyətli şəxsləri, məktəbin müəllim və şagird kollektivi iştirak ediblər.
Çıxış edən polis əməkdaşları və digər şəxslər narkotik vasitələrin qarşısının alınması üçün onun fəsadları, hansı faciəvi nəticələrə gətirib çıxarması barədə gənclərin məlumatlı olmalarının vacibliyini vurğulayaraq, maarifləndirici tədbirlərin əhəmiyyətindən söz açıb, məktəblilərə narkotiklərdən uzaq durmağı, vətənpərvərlik ruhunda böyümələri və layiqli vətəndaş olmaları üçün dəyərli tövsiyələr veriblər. Qeyd olunub ki, hər bir şagird zərərli vərdişlərdən uzaq durmalı, yüksək təhsil almalı, müasir informasiya texnologiyalarından istifadə etməyi bacarmalı, idmanla məşğul olmalı, milli-mənəvi dəyərlərimizə sədaqət ruhunda böyüməli, cəmiyyətimiz üçün sağlam fərdə çevrilməlidirlər.
Sonda şagirdləri maraqlandıran suallar cavablandırılıb.
Xəbərdən istifadə edərkən istinad etmək vacibdir.
