Sumqayıt Şəhər İcra Hakimiyyəti Başçısı yanında Narkomanlığa və Narkotik Vasitələrin Qanunsuz Dövriyyəsinə Qarşı Mübarizə üzrə Komissiyanın təşəbbüsü, şəhər Gənclər və İdman Baş İdarəsi , Polis İdarəsi, Narkoloji Dispanserin və Dini Qurumlarla iş üzrə Dövlət Komitəsi Sumqayıt bölgəsi üzrə şöbənin birgə təşkilatçılığı ilə "Gəncləri Dini radikalizm –ekstremizm və narkomaniyanın zərərli təsirlərindən qoruyaq" adlı maarifləndirici xarakterli görüş keçirilmişdir. Məqsəd yeniyetmə və gəncləri sağlam həyat tərzinə təşviq etmək, narkomaniya, tütün, alkoqol və digər psixatrop maddələrin mənfi təsiri ilə bağlı bilikləndirmək, cəmiyyət üçün narahatlıq doğuran dindən siyasi məqsədlər üçün istifadə edən, din pərdəsi altında radikal və ekstremist meyillərini təbliğ edən, dövlət - vətəndaş həmrəyliyini pozmağa, xalqın tarixi dəyərlərinə, milli düşüncə sisteminə zərbə vurmağa istiqamətlənmiş hərəkətlərdən qorumaqdır
02 dekabr 2021-ci il tarixində Nizami Gəncəvi adına Texniki və Təiət Elmləri liseyində mövcud pandemiya qaydalarına uyğun keçirilən tədbirdə ilk öncə vətənimizin azadlığı uğrunda canından keçmiş şəhidlərimizin əziz xatirəsi bir dəqiqəlik sükutla yad edilmişdir. Daha sonra qonaqları salamlayan Liseyin direktoru Rüxsarə Əhmədova mövzunun əhəmiyyətindən, narkomaniyanın yeniyetmə və gənclərin şəxsiyyətinin, sağlamlığının inkişafına mənfi təsirindən danışaraq bu bəladan qorunmanın vacibliyini qeyd etmişdir.
Sumqayıt şəhər Gənclər və İdman Baş İdarəsinin rəisi Elgün Hümbətov çıxışında Respublikamızda narkomaniya və narkobizneslə mübarizənin ən üst səviyyədə aparıldığını bildirmiş, şəhərimizdə Narkotik vasitələrin, psixotrop maddələrin və onların prekursorlarının qanunsuz dövriyyəsi və narkomanlığın yayılmasına qarşı mübarizədən, dini radikalizm və ektremizimin qarşısının alınmasından irəli gələn vəzifələrdən danışmış, qabaqlayıcı əməli-profilaktik tədbirlərin mütəmadi olaraq həyata keçirildiyini qeyd etmişdir.
Dini Qurumlarla İş üzrə Dövlət Komitəsinin Sumqayıt bölgəsi üzrə şöbənin əməkdaşı Ülvi Məmmədov çıxışında dini ekstremistlərin milli-dini dəyərlərə hörmətlə yanaşmamasından, tarixi-milli-mənəvi dəyərləri məhv etməyə çalışdıqlarından, fəaliyyətlərində zorakılıq metodundan istifadə etdiklərini bildirmişdir.
Sumqayıt Narkoloji Dispanserin həkimi Vüsal Cabbarov bəşəriyyət üçün ən təhlükəli bəla olan narkomaniyanın gənclər və yeniyetmələr arasında daha çox yayılma təhlükəsindən, sağalmaz xəstəliklərə düçar edən bu dəhşətli bəlanın vurduğu zərərlərdən, törətdiyi fəsadlardan geniş bəhs edərək zərərli vərdişlərdən uzaq olmağı gənclərə tövsiyyə etmişdir.
Sumqayıt şəhər şəhər Polis İdarəsinin əməkdaşları Akşin Məmmədov və Leyla Zeynalova şəhərimizdə narkotiklərin qanunsuz dövriyyəsi və narkomanlıqla, gəncləri milli, bəşəri dəyərlərdən kənarlaşdırmağa sövq etməyə çalışan dini cərəyanların fəaliyyətlərinə qarşı mübarizə sahəsində həyata keçirilən təşkilati-hüquqi, institusional və əməli praktiki tədbirlərdən danışmışlar.
Sonda gəncləri maraqlandıran suallar cavablandırılmış, mövzuya uyğun videoçarxlar nümayiş olunmuş, maarifləndirici bukletlər paylanılmışdır.
Xəbərdən istifadə edərkən istinad etmək vacibdir.
