Sumqayıt şəhər Gənclər və İdman Baş İdarəsinin və Xidmət Sahələri üzrə Sumqayıt Dövlət Peşə Təhsil Mərkəzinin birgə təşkilatçılığı ilə Mərkəzdə mövcud pandemiya qaydalarına uyğun olaraq şəhərin müxtəlif təyinatlı Peşə Təhsil müəssisələrinin tələbələri arasında "Nə? Harada? Nə zaman?” formatında bilik yarışı keçirilib.
Xeberle.com xəbər verir ki, yarışın məqsədi dövlət gənclər siyasətinin prioritet istiqamətləri üzrə peşə təhsil müəssisələri tələbələrinin ictimai həyatda fəal iştirakının artırılması, asudə vaxtlarının səmərəli təşkili, onlar arasında sağlam elmi rəqabət mühitinin yaradılması, ölkənin milli-mədəni irsi və tarixi haqqında maarifləndirilməsidir.
Bilik yarışında ümumilikdə doqquz komanda öz bilik və bacarıqlarını sınayıb.
Ümumi nəticələrə uyğun olaraq Xidmət Sahələri üzrə Sumqayıt Dövlət Peşə Təhsil Mərkəzinin "Dəmir Yumruq”, Sumqayıt Kimya Sənaye Parkı MMC nəznində fəaliyyət göstərən Peşə Təhsil Mərkəzinin "Qarabağ”, Sənaye və Yüksək Texnologiyalar üzrə Sumqayıt Dövlət Peşə Təhsil Mərkəzinin "Odlar Yurdu” komandaları müvafiq olaraq I,II,III yerlərə layiq görülüblər.
Sonda qalib komandalar Baş İdarənin fəxri fərman, medal və hədiyyələri ilə təltif ediliblər.
Xəbərdən istifadə edərkən istinad etmək vacibdir.
