Pedaqogikadan, müəllim peşəsindən, onun sirləri və s.dən anlayışı olmayanlar hətta bayram günlərində də bayramlaşmaq, əylənmək, dincəlmək, boş günlərdən istifadə edib öz üzərində işləmək əvəzinə müəllim haqqında fikirlərini bildirirlər;
"Pis şagird yoxdur, pis müəllim var."
"Oxumayan tələbə yoxdur, uşağın dilini bilməyən müəllim var."
"Müəllim test əzbərlətməli deyil, dərs keçməlidir."
"Müəllim artist olmalıdır." Və s.
Ay gözəl insanlar, bu məmləkətdə müəllim peşəsindən başqa peşə yoxdur?!
Ay sizə qurban olum, bu peşəni bu qədər "professionallıqla" bilirsinizsə, niyə müəllim işləmirsiniz?!
Niyə müəllimin əməyini bu qədər cılızlaşdırırsınız?!
Sizi də bir müəllim yetişdirməyibmi?!
Axı sizdə müəllimə qarşı bu qədər kin-küdurət hardandır?!
Bilirsiniz ki, biz müəllim əməyinə hörmət etməsək, övladlarımız da müəllimi sevməyəcək? Övladlarımız müəllimi sevməsə, tədrisə ciddi yanaşmayacaqlar? Və nəhayət tədrisə ciddi yanaşmasalar, cəmiyyətin bildiyiniz uçurumu başlayacaq?
Dünyada hər şeyə dəyər vermək mümkündür, lakin müəllimin əməyinə əsla dəyər verilə bilməz. Bunu isə mən demirəm, yunan filosofu Sokrat deyib.
Olmaz ki, bekar olanda daha faydalı işlərlə məşğul olaq?!
Gülşən Ömərova
Pedaqoq
Xəbərdən istifadə edərkən istinad etmək vacibdir.
