Sumqayıtda İsmət Qayıbov adına 1 nömrəli orta məktəbdə 9-11-ci siniflərdən attestat üçün 10 manat məbləğində pul yığıldığı ilə bağlı iddialar yayılıb.
Xeberle.com-a daxil olan məlumatda həmçinin bildirilir ki, bununla yanaşı, yuxarı siniflərdən əlavə olaraq 10 manat məbləğində təmir pulu adı ilə vəsait də toplanır.
Yayılan məlumatlara aydınlıq gətirmək üçün 1 nömrəli orta məktəblə əlaqə saxladıq.
Məktəbin direktoru Kəmalə Hüseynova Xeberle.com-a açıqlamasında iddiaları təkzib edib və məsələyə belə aydınlıq gətirib: "Attestatla bağlı bizim məktəbdə heç kəsdən pul yığılmayıb, yayılan məlumatlar həqiqəti əks etdirmir. Ola bilər ki, dərslərdə iştrak etməyən, 9-cu sinifə qədər güzəştli qiymətlərlə gələn şagirdlərin valideynləri belə danışsınlar. Çünki biz həmin şagirdlərin valideynləri ilə dəfələrlə danışıqlar aparırıq və bildiririk ki, sizin övladlarınız oxumur, dərslərdə iştrak etmirsə, peşə məktəblərinə yönəldin sənət öyrənsinlər. Amma bəziləri bizim dediklərimizi anlamaq istəmir, israrla övladlarının 10-11-ci siniflərdə oxumalı olduğunu bildirirlər. Məhz həmin valideynlər heç bir əsası olmayan məlumatlar yayırlar.
K. Hüseynova təmirlə bağlı pul yığıldığı iddialarını isə absurd adlandırıb: "Yeni tikilmiş məktəbdə nə üçün təmir pulu yığılmalıdır ki? Şər danışanda uyğun danışsınlar ki, inandırıcı olsun”.
Xədicə Səxavətqızı
Xeberle.com
Xəbərdən istifadə edərkən istinad etmək vacibdir.
