General M.Əsədov adına İnteqrasiya təlimli internat tipli gimnaziya şəhərimizdə təhsil ocaqları sırasında gözəl ənənələri ilə özünəməxsus yer tutur. Burada müxtəlif səpkidə tədbirlər həyata keçiriir. Müəllim və şagirdlərin iştirakı ilə keçirilən növbəti maarifləndirici yığıncaq ölkə başçımızın 22 iyul 2020-ci il tarixli 2173 nömrəli Sərəncamı ilə təsdiq edilmiş "Azərbaycan Respublikasında insan alverinə qarşı mübarizəyə dair 2020-2024-cü illər üçün Milli Fəaliyyət Planı”nın icrası ilə bağlı "Ailə dəyərlərinin inkişafı”, "Erkən nikaha yox deyək”, "İnsan alverinin qurbanı olmamaq üçün nələri bilməliyik” mövzularına həsr olunmuşdur.
Öncə şəhidlərimizin əziz xatirəsi bir dəqiqəlik sükutla yad edilmişdir.
Sumqayıt şəhər Ağsaqqallar Şurasının sədri Təbrik Quliyev, məktəbin direktoru Qönçə Hüseynova, Tərbiyə işləri üzrə direktor müavini Alidə Məmmədova və başqalarının çıxışları şagirdlərin marağına səbəb olmuşdur. Natiqlər erkən nikahın uşaqlara, yeniyetmələrə və gənclərə, ailələrə, bütövlükdə cəmiyyətə vurduğu zərərlər, bu sosial problemin aradan qaldırılması yolları haqqında ətraflı bəhs etmişlər. Bildirmişlər ki, erkən nikah hallarına zəmin yaradan əsas səbəblərdən birincisi təhsildən yayınmaqdır. Valideynlərin maddi imkansızlıq bəhanəsi ilə övladlarını məktəbdən uzaqlaşdırması son nəticədə erkən nikaha yol açır. Çıxış edənlər eyni zamanda, narkomiyanın insan həyatına, sağlam gənc nəslin yetişməsinə mənfi təsirləri, narkotiklə mübarizə ilə bağlı şəhər ərazisində görülən tədbirlərlə bağlı fikirlərini bölüşməklə yanaşı, iştirakçılara öz məsləhət və tövsiyələrini söyləmişlər. Vurğulanmışdır ki, belə halların qarşısının alınması üçün ardıcıl maarifləndirmə tədbirlərinin aparılması zəruridir.
İlhamə Məhəmmədqızı
Xəbərdən istifadə edərkən istinad etmək vacibdir.
