Bu gün Sumqayıtda “Yurdumuza bahar gəlir” mövzusunda asfalt üzərində rəsm müsabiqəsi keçirilib.

Gün.Az xəbər verir ki, müsabiqə Sumqayıt şəhər İcra hakimiyyətinin təşəbbüsü və tövsiyəsi ilə şəhər Təhsil Şöbəsinin tədbirlər planına əsasən baş tutub.

Tədbirdə şəhər rəhbərliyi, məktəb direktorları, şəhər ictimaiyyəti və digər qonaqlar iştirak ediblər.

Mərasimdə Sumqayıtın orta ümumtəhsil məktəblərinin şagirdləri hərbi vətənpərvərlik mövzusunda asfalt üzərində işlədikləri rəsm işlərinə baxış keçirilib və ayrı-ayrı məktəbləri təmsil edən şagirdlər çəkdikləri rəsmlər haqqında şəhər İcra Hakimiyyətinin başçısına və digər qonaqlara ətraflı məlumat veriblər.

Tədbirdə müsabiqənin ilkin mərhələlərində qalib olmuş müxtəlif məktəbləri təmsil edən şagirdlərin ən yaxşı rəsm əsərləri nümayiş olunub.

Belə tədbirlərin ənənəvi olaraq keçirilməsinin çox vacib bir məsələ olduğunu qeyd edən icra başçısı sonda öz dəyərli tövsiyələrini verib.

Fidan Əliyeva
Tofiq Babayev ( Foto)