Bu gündən etibarən Prezident yanında Əfv Məsələləri Komissiyasının iclaslarının keçirilməsinə başlanılıb. İlk iclas bu günə çağırılıb. Komissiyanın toplantılarında məhbusların əfvlə bağlı müraciətlərinə baxılacaq, yekunda siyahı hazırlanaraq Prezidentə təqdim olunacaq.
Builki əfv sərəncamının "Heydər Əliyev ili”nə təsadüf etməsi əlamətdar hadisə kimi qiymətləndirilir. Ehtimal olunur ki, əvvəlki illərlə müqayisədə bu dəfə daha çox şəxs əfv olunacaq.
Əfv Məsələləri Komissiyasının üzvü Əliməmməd Nuriyev Modern.az-a açıqlamasında bildirib ki, əfvlə bağlı çoxsaylı müraciətlərin olması gözlənilir.
"Əfv Komissiyasına nə qədər müraciətin daxil olması barədə hazırda dolğun məlumat yoxdur. Çoxsaylı müraciətlərin olması gözləniləndir. Buna səbəb 2023-cü ilin "Heydər Əliyev İli” olmasıdır. Çoxlarının gözləntiləri böyükdür. Məhkumlar, onların ailə üzvləri, vəkilləri, eyni zamanda QHT nümayəndələri, deputatlar tərəfindən müraciətlər olub. Əlbəttə, bütün müraciətlərin ünvanı cənab Prezidentdir. Bu da Prezidentə inam və etibarla bağlıdır. Prezident öz mərhəmətli siyasəti ilə hər kəsin qəlbinə yol açıb. Bütövlükdə, indiyə qədər 36 əfv sərəncamı imzalanıb. Bu müddət ərzindən 5000-ə yaxın şəxs ya cəzadan tam azad edilib, yaxud cəzalarının bir qismindən azad olunub”.
Ə.Nuriyevin sözlərinə görə, bu il Əfv Komissiyasının üzərinə böyük məsuliyyət düşür.
"Komissiya öz işini Prezidentin müəyyənləşdirdiyi tapşırıqlara uyğun olaraq həyata keçirir. İclaslara daxil olan müraciətlər hərtərəfli araşdırılacaq. Qanunvericiliklə müəyyən edilmiş kriteriyalara uyğun olaraq rəylər hazırlanıb, Prezidentə təqdim olunacaq. 2023 sıradan il deyil. Azərbaycan tarixində müstəsna rolu olan, ümumilli lider Heydər Əliyevin 100 illliyi ilə bağlı çox sayda insan əfv oluna bilər. Arzu edərdim ki, istəyimiz baş tutsun”.
Əfv sərəncamının Novruz bayramı, yoxsa Heydər Əliyevin doğum günü ərəfəsində verilməsinə gəlincə, Komissiya üzvü deyib:
"Əfv sərəncamı Prezidentin müstəsna konstitusion hüququdur. Sərəncamın nə vaxt veriləcəyi Prezidentin səlahiyyəti daxilindədir. Bu, ilk növbədə komissiyanın işini nə vaxt başa çatdıracağı və hazırlanmış sənədlərin təqdim olunmasından asılıdır. Əfv sərəncamı ənənəvi olaraq mart ayında verilə bilər. Bu ilin əhəmiyyətini nəzərə alaraq sərəncamın may ayında da verilməsi mümkündür”.
Qeyd edək ki, sonuncu əfv sərəncamı 2022-ci ilin may ayında verilib. Dövlət başçısının imzaladığı sərəncamla 213 nəfər əfv edilib.
Xəbərdən istifadə edərkən istinad etmək vacibdir.
