"Azərbaycan Dəmir Yolları" QSC ötən il yol infrastrukturunun müasirlədirilməsi istiqamətində 363 km uzunluğunda Sumqayıt-Yalama dəmiryol xəttinin yenidən qurulmasını qrafikə uyğun davam etdirib və tikinti işlərinin 48 %-i icra olunub.
Xeberle.com bu barədə səhmdar cəmiyyətinə istinadən xəbər verir.
"Layihənin tamamlanması gələcəkdə bu istiqamətdə daha çox yükün sürətlə və təhlükəsiz daşınmasına geniş imkanlar yaradacaq", - deyə qurum bəyan edib.
Qeyd edək ki, Abşeron yarımadasını respublikanın şimal sərhədi ilə birləşdirən Sumqayıt-Yalama dəmir yolunun ox üzrə uzunluğu 167,7 km, açılmış uzunluğu 362,8 km, o cümlədən əsas yolların uzunluğu 328,3 km, yan yolların uzunluğu 27 km, yoldəyişənlərin isə uzunluğu 7,5 km təşkil edir.
Bugünədək yolun 154,8 km-lik hissəsində yeni rels-şpal şəbəkəsi quraşdırılıb. Görülən işlər çərçivəsində dəmir yolun 142,9 km-i ilkin hərəkətə açılıb.
İkixətli Sumqayıt-Yalama dəmir yolun bir xətti yenidən qurularkən digərində qatarlar hərəkət edir.
Sumqayıt-Yalama dəmir yolu xəttinin yenidən qurulması yükdaşıma və sərnişindaşıma fəaliyyətlərində vaxta qənaət, nəqliyyat vasitələrinin və infrastrukturun istismarı xərclərinə qənaət, ətraf mühitə təsirin azaldılması, təhlükəsizliyin artırılması kimi faydalar gətirəcək.
Xəbərdən istifadə edərkən istinad etmək vacibdir.
