"Azərikimya” İstehsalat Birliyində 31 Mart – Azərbay­can­lıların soyqırımı günü ilə əlaqədar anım mərasimi keçirilib. Birliyin Mətbuat xidmətindən Xeberle.com-a verilən məlumata görə, tədbirdə soy­qırımı qurbanlarının xatirəsi bir dəqiqəlik sükutla yad edildikdən sonra, iştirakçılara 31 Mart hadisələri haqqında geniş məlumat verilib. 
Çıxış edənlər vurğulayıblar ki, azərbay­canlılara qarşı məqsədyönlü şəkildə həyata ke­çirilmiş etnik təmizləmə və soyqırım siyasəti nəticəsində xalqımız ağır məhrumiy­yətlər, milli faciə və məşəqqətlərlə üzləşib, indi Ermənistan adlandırılan ərazidən - min illər boyu öz doğma tarixi-etnik torpaqlarından didərgin salınaraq kütləvi qətl və qır­ğınlara məruz qalıb, minlərlə tarixi-mədəni abidə və yaşayış məs­kəni dağıdılıb viran edilib. 1918-ci ilin mart ayında Bakı, Şa­maxı, Salyan, Quba, Lənkəran,  Göy­çay və digər bölgələrdə, həmçinin Göyçə, Zəngəzur mahallarında və Naxçıvan Muxtar Respublikasında  erməni vandalları görünməmiş vəhşiliklər törədib, üç gün davam edən qırğın və dağıntılar zamanı ümumilikdə minlərlə kənd yerlə-yeksan edilib, yüz minlərlə azərbay­canlı­nın həyatına son qoyulub.
"Azərikimya” İstehsalat Birliyinin Müşahidə Şurasının sədri Muxtar Babayev azərbaycanlıların öz doğma yurd-yuvala­rından qovul­duğu, repressiyalara məruz qaldığı həmin günləri XX əsr dünya tarixi­nin ən qanlı səhifə­lərindən biri adlandırıb və bu soyqırımı erməni daşnaklarının təxminən 200 ildən artıq davam etdirdiyi, düşünülmüş və planlı şəkildə həyata keçirdiyi məkrli anti­azərbaycan siya­sətinin kütləvi deportasiya və soyqırım ilə müşayiət olunan davamı kimi qiymətləndirib.
YAP Sumqayıt şəhər Təşkilatının Şura üzvü Vəzirxan Ənsərov qeyd edib ki,  bu gün soyqırımına məruz qalmış soydaşlarımızın xatirəsini ürək ağrısı və ehtiramla yad edirik. Bu hər birimizin vətənpərvərlik, azərbaycançılıq borcumuzdur və hamımız böyük minnətdarlıqla xatırlayırıq ki, bu ənənənin təşəbbüskarı xalqımızın dahi, müdrik rəhbəri Heydər Əliyev olub: "Ulu öndər 26 mart1998-ci il tarixli sərəncamı ilə 31 mart gününü "Azərbaycanlıların soyqırımı günü” kimi rəsmiləşdiməklə böyük bir uzaqgörənliklə xalqımız üçün mühüm bir xidmət göstərə bilib. Həmçinin Azərbaycan Respublikasının Prezidenti İlham Əliyevin apardığı uğurlu xarici siyasət nəticəsində erməni millətçilərinin iç üzü açılaraq, onların siyasi riya­karlığı, saxtakarlığı, özgə torpaqlarına göz dikərək, əsrlərdən bəri həyata keçir­dikləri işğalçılıq siyasəti dünya ictimaiyyətinə bəlli olub.”

Tədbirin sonunda soyqırımı hadisələrini özündə əks etdirən sənədli film nümayiş olunub.