Elnur Aslanov – 2007-ci ildən dünənə qədər Prezident Administrasiyasının Siyasi təhlil və informasiya təminatı şöbəsinin müdiri idi.
Aslanov Elnur Kazım oğlu 15 yanvar 1977-ci ildə Bakıda anadan olub. Bakı Dövlət Universitetini və “Azərbaycan” Universitetini bitirib.

1997-2001-ci illərdə Yeni Azərbaycan Partiyası Mərkəzi Aparatının Beynəlxalq əlaqələr və siyasi partiyalarla iş şöbəsində təlimatçı, baş referent, 2001-2005-ci illərdə Prezidentin İcra Aparatının İctimai-siyasi şöbəsinin İnformasiya işinin təşkili və analitik təhlil sektorunda referent, böyük məsləhətçi, 2005-2007-ci illərdə isə Prezidentin İcra Aparatı rəhbərinin köməkçisi vəzifəsində işləyib.

Dövlət başçısının 19 dekabr 2007-ci il tarixli Sərəncamı ilə Administrasiyasının Siyasi təhlil və informasiya təminatı şöbəsinin müdiri təyin edilib.

Yeni Azərbaycan Partiyasının üzvü, I dərəcə dövlət müşaviridir.

Və nəhayət millət vəkili Rəbiyyət Aslanovanın oğludur.

Türkiyədəki Nurçuluq hərəkatına qarşı münasibət birmənalı müstəvidən çıxdıqdan sonra hərəkatla bağlı müzakirələr Azərbaycana da sıçradı. Nurçuluq dəftərində adı keçənlərdən biri də Elnur Aslanov oldu.

Bu təsadüfi idimi?

Elnur Aslanovun adı yerli mətbuatda dünənədək “Fətullah Gülənin mənəvi oğlu” kimi çəkilirdisə, dünən ölkə prezidentinin sərəncamı ilə vəzifəsindən azad olunduqdan sonra Türkiyə mətbuatında “Fətullah Gülənin sağ əli” olaraq gündəmə gəldi.

Yuxarıda da gördüyünüz kimi Elnur Aslanovun təhsil illəri Azərbaycanda keçib. O nə nurçu kəsimin çox olduğu Ankara universitetlərində, nə də ki, nurçuların dolayısı ilə maliyyələşdiyi Pensilvaniyada təhsil alıb. Elnur Aslanovun Fətullah Gülən və nur camaatı ilə əlaqələrinin tarixində anası Rəbiyyət Aslanovanın dayandığı deyilir. Elnur Aslanov haqda “nurçu” xəbərləri yayıldığı zaman Rəbiyyət Aslanovanın mətbuatda geniş məqaləsi çap edildi. Ana millət vəkili 17 min işarəlik məqaləsində bircə dəfə də olsun nurçuluq haqda nurçuluq və nurçuluq əleyhinə ifadə işlətməyib. Aparılan qaralama kampaniyası haqda yazıda kimin qaralanması, hadisələrin hansı ölkədə cərəyan etməsini belə, anlamaq olmur.

Nurçuluq sonunadək sübut olunmayan suçdur. İndiyədək nurçu cərəyanında adı hallanan heç bir rəsmimiz “Nurçuluq çox pis şeydir, mən isə nurçu deyiləm” deməyib.

Elnur Aslanov niyə vəzifəsindən uzaqlaşdırıldı?

Azərbaycanda vəzifəsindən uzaqlaşdırılan istənilən vəzifəli haqda mediaya məlumat sızır və ya işdən çıxarılması sonradan müzakirəyə çevrilir. Elnur Aslanovun vəzifəsindən uzaqlaşdırılması isə müzakirə predmeti belə olmadı.

Elnur Aslanova yaxın olanların aqibətinin sonradan “pis” olacağı haqda xəbərlər hələ ki, təsdiqini tapmayıb. Dünən vəzifəsindən uzaqlaşdırıldığı xəbəri yayılan XİN-in mətbuat xidmətinin rəhbəri Elman Abdullayev açıqlama verərək, nurçuluğun nə demək olduğunu belə bilmədiyini dedi. Elman Abdullayevin isə yaxın aylarda səlahiyyət müddətinin rəsmən bitdiyi deyilir.

Elnur Aslanovun “xəbər qovşaqları”nın sonu necə olacaq?

“Yurd TV” internet televiziyası, “Bakupost” və “Bakraboçi” qəzetlər(internet portalları ilə birgə), “1 news.az, “Gun.az”, “ireli.tv”, “iradio.az” və digər bir neçə internet portalına Elnur Aslanov nəzarət edirdi. Bu KİV-lərin də idarəetməsi hələ ki, açıq qalır.

(interpress.az)