Sumqayıt Regional Mədəniyyət İdarəsinə tabeli Bartaz kənd Uşaq Musiqi Məktəbinin əməkdaşları və Zəngilan rayon Nümayəndəliyi Vətən müharibəsi şəhidi Amin Qəfərlinin məzarını, sonra ailəsini ziyarət ediblər. Ziyarət zamanı şəhidimizin əziz xatirəsi anılaraq, onun keçdiyi qəhrəmanlıq yolundan danışılıb. Kollektiv ailənin qayğıları ilə maraqlanaraq, maddi və mənəvi dəstək olublar. Qeyd edilib ki, Amin Qəfərlinin keçdiyi qısa, lakin mənalı həyat yolu, qəhrəmanlığı və vətənpərvərliyi hər bir azərbaycanlı gənc üçün örnəkdir. Şəhidin həyat yolundan danışan ana Natavan Qəfərli 18 yaşlı oğlunun necə vətənpərvər, cəsur və qürurlu olduğunu dilə gətirərək qeyd edib ki, Xüsusi Təyinatlı Qüvvələrdə xidmət etmək üçün könüllü ərizə yazan Amin, vətəni layiqincə qoruyacam deyirdi. 13 sentyabr tarixində Ermənistanın törətdiyi təxribatlar nəticəsində Laçında qəhrəmancasına şəhid olan Amin Qəfərlinin nəşi sentyabrın 15-də Bakıya gətirilib və II Fəxri xiyabanda dəfn edilib. Amin Qəfərlı bütün şəhidlərimiz kimi daim xalqımızın qəlbində yaşayacaq, xatirəsi ehtiramla yad olunacaq. Sonda şəhidimizin valideynləri göstərdikləri diqqət və qayğıya görə Azərbaycan Respublikasının Prezidenti cənab İlham Əliyevə minnətdarlığını bildiriblər.
Xəbərdən istifadə edərkən istinad etmək vacibdir.
