Sumqayıt Regional Mədəniyyət İdarəsinə tabeli Gənclər Kitabxanasının kollektivi və Laçın rayonu Məzahir İsmayılov adına Cicimli kənd tam orta məktəbin kitabxana müdiri və şagird heyəti Vətən müharibəsi qəhrəmanı, XTQ giziri, "Qisas əməliyyatı”nda şəhid olan Nəzər Əzizovun ailəsini ziyarət ediblər.
Xeberle.com xəbər verir ki, tədbirin əvvəlində Gənclər kitabxanasının müdir v.m.i.e. Leyla Mahmudova şəhidin qısa, lakin şərəfli ömür yolu haqqında danışaraq qeyd edib ki, Nəzər Əzizov həm aprel döyüşlərinin iştirakçısı, həm də 44 günlük Vətən müharibəsinin zəfərini qazanan qəhrəmanlardandır. Azərbaycan Respublikasının Prezidenti cənab İlham Əliyevin Sərəncamlarına əsasən "Cəsur döyüşçü" medalı, "Cəbrayılın azad olunmasına görə", "Füzulinin azad olunmasına görə" və "Xocavəndin azad olunmasına görə" medalları ilə təltif edilib. Vətənə əmanət iki körpə övladı yadigar qalıb. Sonra şəhidin xanımı Nərmin Əzizova qəhrəmanımız haqqında xatirələrini bölüşüb. Tədbir Laçın rayonu, M.İsmayılov adına Cicimli tam orta məktəbin şagirdlərinin, qəhrəmanlara həsr olunan şeirləri ilə davam edib. Cicimli tam orta məktəbin kitabxana müdiri İlhamə Məmmədova çıxış edərək, qəhrəmanımızdan qalan həmişə fəxr duyulası adı, anılacaq xatirəsi qaldığını vurğulayaraq şəhidin ailəsinə səbr diləyib. Sonda Gənclər kitabxanası və məktəbin kitabxana müdiri İlhamə Məmmədovanın birgə hazırladıqları Nəzər Əzizovun xatirə lövhəsi və bayram sovqatı qəhrəmanın əmanəti Nərmin Əzizovaya təqdim edilib.
Xəbərdən istifadə edərkən istinad etmək vacibdir.
