Novruz gəlir yaz gəlir,
Bir əlində saz gəlir,
Bir əlində xonçası,
Açıb gülün qönçəsi,
Bülbülə avaz gəlib,
Novruz gəlib, yaz gəlib.
Novruzun gəlişi ilə bütün canlı aləm yenidən oyanmağa başlayır. Təbiət canlanır, insanlar daha gümrah və fəal olurlar. Günəş öz şüalarını bolluca və səxavətlə Yer üzərinə səpələyir. Ağaclar qış yuxusundan oyanır və şirələnir. Tezliklə tumurcuqlar cücərir və yaşıl yarpaqlara çevrilir. Hava gözəl, təmiz və yüngül olur.
Yazın gəlişinə hazırlıqları görmək, Novruz abı-havasını duymaq üçün şəhərimizdə çox insanın sevimli məkanlarından biri olan Nəsimi adına Mədəniyyət və İstirahət Parkına üz tuturuq. Bura öz rəngarəngliyi ilə seçilir. Təbiətin oyanışı Parkda daha çox hiss edilir. Bənövşə, nərgiz, novruz güllərinin və yovşan kollarının yeni cücərtilərinin ətrini duyursan. Təmizlik işlərinin görülməsini, mövsümi güllərin əkininin davam etdirilməsini, müxtəlif növdə ağacların əkilməsini görürük. Parka gələn sakinlərin sayı daha da artır. İnsanlar ailə üzvləri, yaxınları ilə parkdakı istirahət guşələrinə toplaşır, pikniklər təşkil edirlər. Ərazidəki ictimai iaşə obyektlərində sakinlərə müxtəlif xidmətlər təqdim olunur.
Burada gənc sevgililər ya skamyada oturub söhbət edir, ya dənizi seyr edir, ya da gəzişirlər. Onların yerini yaşlılar və uşaqlarla yanaşı, öz ailəsi , dostları, iş yoldaşları, sinif, tələbə yoldaşları ilə gəzintiyə çıxan gənclər doldurur. Artıq gün batmağa başlayır. Parkda gəzərkən vaxtın necə keçdiyini hiss etmirik. Axşam saatlarında Parkda canlanma müşahidə olunur.Yaşlı sakinə yaxınlaşırıq. Özünü təqdim edir: Adım Bəylərdir. Uzun illərdir Sumqayıtda yaşayıram. Hər dəfə bu istirahət məkanına gələndə mənəvi cəhətdən özümü rahat hiss edirəm və bütün qayğılarımı unuduram. Sakitlik, təmizlik, səliqə-sahman ürəyimcədir. Ölkə başçımıza və şəhərimizin rəhbərliyinə biz sakinlər üçün yaratdıqları bu cür gözəl şəraitə görə hədsiz minnətdarıq.
İki uşaq anası Arzu xanım parkı şəhərimizin əvəzsiz məkanı adlandırdı: "Burada 1 saat gəzmək insanı başqa aləmə aparır. Lakin buradakı bahaçılıqdan narazıyam. Uşaq nəsə istədikdə ikiqat qiymətə almaq məcburiyyətində qalırıq. Buraya uşaqla gəlmək üçün cibində xeyli pul olmalıdır. Balacadır, maşınları, karuselləri görür, minmək istəyir. Mindirməyəndə də o qədər ağlayır ki, gəlməyinə peşman olursan. Əvvəllər bizim uşaqlığımızda burada qiymətlər ucuz idi. İndi gündən-günə bahalıqdır”.
Parkdan qayıdarkən artıq hava qaralmışdı. Evə yollanırdıq ki, musiqi səsini eşitdik. İnsanların bəzisi ətrafda telefonuna çəkir, bəzisi kənarda əyləşib canlı musiqini dinləyir, daha da həvəslənirdilər.
Bir sözlə, təbiətin göz oxşayan dəyişikliklərini müşahidə etmək, yazın ətrini duymaq və bahar tədbirlərində iştirak etmək istəyirsinizsə, istirahət məkanlarımıza üz tutun, əziz sumqayıtlılar və şəhərimizin qonaqları!
İlhamə Məhəmmədqızı
Xəbərdən istifadə edərkən istinad etmək vacibdir.
