Bu, Hesablama Palatasının 2014-cü ildəki fəaliyyətinə dair hesabatında əksini tapıb.

Hesabatda bildirilir ki, İcra Hakimiyyətinin İnformasiya və Reklam Departamentində audit nəticəsində müəyyən edilib ki, reklam yayımına icazə verilməsinə dair sifarişçilərlə bağlanmış müqavilələr əsas götürülməklə reklam daşıyıcılarının müvafiq meyarlar, o cümlədən tarix zonaları, sifarişçilər, ünvanlar, yerləşdirilmə yerləri, reklam daşıyıcılarının ölçüləri, reklam mövzuları və sair üzrə dislokasiyası tərtib edilməyib. Sifarişçilərlə bağlanmış müqavilələr üzrə debitor və kreditor borcların uçotu aparılmayıb. Debitor və kreditor borcların uçota alınması təmin edilməyib, eyni zamanda 169 əməliyyat üzrə 8450,0 manat məbləğində dövlət rüsumunun tutulması və dövlət büdcəsinə ödənilməsi təmin olunmayıb.

Auditlə əhatə olunan dövrün sonuna ticarət və xidmət obyektlərinə reklam yayımına icazə verilməsinə dair qüvvədə olan müqavilələrin sayı 217 müqavilə təşkil etməklə Sumqayıt şəhəri üzrə potensial həcmdən əhəmiyyətli dərəcədə aşağı olub, eyni zamanda reklam qanunvericiliyinin pozulması hallarının aradan qaldırılmasını nəzərdə tutan aidiyyəti hüquqi və fiziki şəxslərə göndərilmiş bildirişlər üzrə tədbirlər görülməyib. Tarif (qiymət) Şurasının müvafiq qərarları ilə küçə reklamı yayımı üzrə müəyyən edilmiş tariflər üzrə sifarişçilər üçün hər hansı digər xidmətlərin, eskizlərin tərtib olunmasının, foto-şəkillərin çəkilməsinin və reklam daşıyıcılarının montajı xidmətlərinin göstərilməsinin nəzərdə tutulmamasına baxmayaraq həmin xidmətlərin həyata keçirilməsi məqsədilə Departamentdə struktur bölmələri formalaşdırılıb və müvafiq muzdlu işçilər cəlb edilərək əmək haqqı xərcləri ödənilib.

Bundan başqa İcra Hakimiyyətinin Memarlıq və Şəhərsalma İdarəsində aparılan yoxlama nəticəsində də məlum olub ki, Sumqayıt şəhərinin mövcud baş planının 1978-ci ildə təsdiq edilməsinə baxmayaraq yoxlama aparılan tarixədək yeni baş planı hazırlanaraq təsdiq edilməyib, memarlıq və tikinti işləri ilə bağlı şəhər İcra Hakimiyyəti aşçısı tərəfindən verilmiş sərəncamların İdarəyə daxil olmasının, iş və xidmətlərə görə vətəndaşlardan və hüquqi şəxslərdən daxil olan ərizə və müraciətlərin qeydiyyatı, uçotu aparılmayıb. İcra başçısının sərəncamlarının icrası ilə əlaqədar müvafiq layihələrə rəylərin verilməsi zamanı təqdim olunmuş sənədlərin Şəhərsalma və Tikinti Məcəlləsində nəzərdə tutulduğu kimi tamlığı təmin edilməyib. Bir sıra hallarda iş və xidmətlərin göstərilməsi ilə bağlı fiziki və hüquqi şəxslərlə müqavilə bağlamadan maliyyə əməliyyatları aparılıb, göstərilən xidmətlər və onların xidmət haqları müvafiq normativ sənədlərə uyğun tənzimlənməyib, "Dövlət rüsumu haqqında” qanun ilə tənzimlənən xidmətlərə görə əlavə xidmət haqları da alınıb.

İdarənin xərclər smetası müvafiq qaydada təsdiq edilməyib, işçilərin əmək haqlarına edilmiş əlavələr əsaslandırılmayıb. Hökumətlərarası əməkdaşlıq haqqında sazişə əsasən tərəfdaş ölkə ezam edilmiş mütəxəssislərin əmək haqqının ödənilməsini öz öhdəsinə götürməsinə baxmayaraq xarici ekspert müvəqqəti əmək müqaviləsi ilə işə götürülüb və əsassız olaraq ona əmək haqqı, mükafat ödənilib. İdarədə əsasnamə ilə müəyyən olunan fəaliyyətdən kənar vəsaitlər xərclənib. Əsassız olaraq debitor borları hesabdan silinib və mövcud debitor borc uçota alınmayıb. 14 halda göstərilən xidmətə görə xidmət haqqı alınmayıb. İdarənin baş kitabı, maliyyə hesabatları, kassa, əmrlər, xidmətlərin hər bir növü üzrə qeydiyyat kitabları olmayıb. Bəzi hallarda kassa məxaric sənədlərində tarixlər, ad və soyadlar öz əksini tapmayıb.

Hesablama Palatasının Kollegiyası Sumqayıt şəhər İcra Hakimiyyətindəki auditin nəticələrini müzakirə edib, əvvəlcə İnformasiya və Reklam Departamentindəki, daha sonra Memarlıq və Şəhərsalma İdarəsindəki nöqsan və çatışmazlıqlar ilə bağlı qərar qəbul edib. Hər iki qərarlar Sumqayıt Şəhər İcra Hakimiyyətinə göndərilib. Nəzarət tədbirlərinin nəticələri barədə Milli Məclisə məlumat verilib.

Şəhər İcra hakimiyyətindən aşkar olunan nöqsanlarla bağlı tədbirlər görüldüyü, hüquqi və fiziki şəxslərdən reklam yayımına  icazəyə görə tutulmamış dövlət rüsumunun 2150,0 manatının tutularaq dövlət büdcəsinə ödənildiyi, uçota alınması təmin edilmiş debitor borcların ödənilməsi ilə bağlı bütün hüquqi və fiziki şəxslərə məktubların göndərildiyi, məhkəmədə iddia qaldırılması üçün hazırlandığı və bütün bunlarla bağlı əlavə məlumatın veriləcəyi bildirilib.  (apa.az)