Azərbaycanın Laçın yolunda, Həkəri çayı üzərində nəzarət-buraxılış məntəqəsi quraşdırması erməniləri əməlli-başlı təşvişə salıb. Hazırda orada gömrük əməkdaşlarımızın fəaliyyətə başlaması haqda yayılan xəbərlər isə sözün əsl mənasında bomba effekti yaradıb. Belə ki, ermənilər tranzit kimi ərazimizdən istifadə etdikləri təqdirdə rüsum ödəməli olacaqlar. Bəs görəsən, Laçın yolunda buraxılış məntəqəsinin və gömrük postunun qoyulması bizə hansı iqtisadi dividentlər qazandırır?
Mövzunu KONKRET.az-a şərh edən iqtisadçı Eyyub Kərimli bildirib ki, Laçın yolunda gömrük postunun qoyulması gələcəkdə oradan keçən tranzit avtomobillərdən rüsum almağımızla nəticələnəcək: "Bu gəlirlər isə dövlət büdcəsinə cəlb olunacaq. Ora bizim ərazimizdir. Bu səbəbdən də Laçın yolundan Xankəndi istiqamətinə hərəkət edən hər bir avtomobil Azərbaycana rüsum ödəməli olacaq. Həmçinin başqa ölkələrdən gələn yüklərə görə də rüsum tələb ediləcək. Gələcək perspektivdə Ermənistanla hər hansısa sahədə iqtisadi mübadilə aparılsa, o zaman Azərbaycanın digər ölkələrə tətbiq etdiyi qaydalar İrəvana da şamil olunacaq. Bizim ölkəyə daxil olan maşınlardan tələb edilən rüsumlar onlardan da alınacaq. Bu, həm bizim xarici ticarət dövrüyəmizi artıracaq, həm də gələcəkdə iqtisadi inteqrasiyanı qanuniləşdirəcək. Ümumilikdə, proseslər büdcə daxilolmalarını artıracaq”.
Mövzu ilə bağlı saytımıza açıqlama verən iqtisadçı ekspert Eldəniz Əmirov bildirib ki, Laçında sərhəd-keçid məntəqəsinin yaradılması hərbi, siyasi və strateji baxımdan atılan addımdır. Sevindirici haldır ki, bu istiqamətdə uğurlu nəticə əldə etmişik: "Hesab edirəm ki, orada Gömrük fəaliyyəti ən qısa zamanda təmin olunsa belə, onun faydaları haqqında fikir söyləmək çox tezdir. Çünki proseslərin hansı formada cərəyan edəcəyindən çox şey asılı olacaq. Burada gömrük fəaliyyətinin tənzimlənməsi və maksimuma çatdırılması üçün illər lazımdır. Bütün hallarda burada olan faydanı rəqəmlərlə söyləmək çox çətindir. Sadəcə Gürcüstan misalında müqayisə aparmaq olar. Belə ki, Gürcüstanla 1,1 milyard dollar ticari dövriyəmiz olub. Yəni qonşu ölkə öz ticari dövriyəsinin 80 faizini Azərbaycanla edir. Düşünürəm ki, Ermənistanla da bu potensial mövcuddur. Amma bunun üçün ilk növbədə sülh sazişi imzalanmalıdır”.
Xəbərdən istifadə edərkən istinad etmək vacibdir.
