60 illik həyatında oxucularının sevgisini qazandığına görə özünü xoşbəxt hiss edən şair-tərcüməçi, Türk Edebiyyatı Vakfının Fəxri üzvü, Əli Kərim adına Sumqayıt şəhər Poeziya evinin direktoru İbrahim İlyaslının yubileyi şəhərimizdə rəsmi şəkildə böyük təntənə ilə qeyd olunub. Bu günlərdə isə Sumqayıt Regional Mədəniyyət İdarəsinə tabeli S.Vurğun adına Mərkəzi Kitabxanada "Oxucularla üz-üzə” silsiləsindən şairlə səmimi görüş keçirildi və hər kəsdə xoş ovqat yaratdı. Tədbir İbrahim İlyaslının həyat və yaradıcılığını özündə əks etdirən videoçarxın nümayişi ilə başladı. Sumqayıt şəhər Mərkəzləşdirilmiş Kitabxana Sisteminin direktor vəzifəsini müvəqqəti idarə edən Natəvan Axundzadə gələn qonaqları salamladıqdan sonra, torpaqlarımızın azadlığı uğrunda canından keçmiş şəhidlərimizin ruhu bir dəqiqəlik sükutla yad edildi. Görüş sual-cavab əsnasında davam etdi. Şairin sevənləri ona poeziyası, şeirlərinin mövzusu, eləcə də çoxyönlü yaradıcılığının bir çox aspektləri ilə bağlı maraqlı suallar ünvanladılar. Onların hər birini özünəməxsus üslubda, ətraflı və dolğun cavablandıran yubilyar ədəbiyyat, poeziya, sənətlə bağlı qənaətlərini bölüşdü. Yeni nəsil, meydana qoyulan çağdaş mətnlər, şeir ruhu, ədəbiyyatın gücü və başqa məsələlər ətrafında fikir bildirən İbrahim İlyaslı kitaba, mütaliəyə yönələn marağın onu sevindirdiyini vurğuladı. Şairin ən böyük arzusu bu oldu ki, oxucuları sevməyi sevsinlər. SDTK-in tələbələri Nərmin Kərimli və Nilufər İsgəndərli şairin "Torunu sudan çək, balıqçı baba” şeirini söylədilər. Daha sonra kitabxananın Uşaq bölməsinin əməkdaşı Yeganə Hüseynovanın şairə hədiyyə olaraq hazırladığı videoçarx maraqla qarşılandı, izləyizilərin zövqünü oxşadı. Mədəniyyət İşçiləri Həmkarlar İttifaqı Sumqayıt şəhər Komitəsinin sədri Şahin Şəfiyev, Sumqayıt Regional Mədəniyyət İdarəsinin məsləhətçisi Leyla Dadaşova, gənc yazarlar Elvin Əlizadə, Gülnar Hüseynova, SDU-nin filologiya fakültəsinin və SDTK-nin tələbələrinin iştirak etdiyi tədbirdə eyni zamanda, şairin şeirlərindən ibarət videoçarxlar nümayiş olundu. Sonda xatirə şəkilləri çəkildi.
İlhamə Məhəmmədqızı
Xəbərdən istifadə edərkən istinad etmək vacibdir.
