Sumqayıt Tibb Mərkəzi (STM) 2023-cü ilin 6 ayı ərzində şəhər əhalisinə göstərilən xidmətlərin statistikasını açıqlayıb. Xidmət sayı 2022-ci ilin ötən dövrü ilə müqayisədə 2 dəfədən çox artıb.
TƏBİB-in tabeliyindəki Sumqayıt Tibb Mərkəzi xəbər verir ki, STM-in tabeliyində olan tibb müəssisələrinə 6 ay ərzində əhali tərəfindən 752 min 771 müraciət qeydə alınıb. Bu müraciətlərdən 733 min 509–u ambulator, 19 min 262-si isə stasionar müraciətlərdir.
Xidmətlərə gəldikdə, bu müddət ərzində əhaliyə 2 milyon 87 min 8 tibbi xidmət göstərilib. Bu xidmətlərdən 1 milyon 502 min 856 ambulator, 584 min 152-si isə stasionardır.
Ötən ilin müvafiq dövrü ilə müqayisədə bu ilin cari dövründə göstərilən xidmət sayı 65 faizdən çox artıb. Belə ki, ötən ilin 6 ayı ərzində xidmət sayı 1 milyon 235 min 820 təşkil edib.
Qeyd edək ki, tibb müəssisəsinə müraciət edən hər bir ölkə vətəndaşı icbari tibbi sığorta ilə Xidmətlər Zərfinə daxil olan tibbi xidmətlərdən ödənişsiz istifadə edə bilər.
Xəbərdən istifadə edərkən istinad etmək vacibdir.
