Şərqi Zəngəzur Regional Mədəniyyət İdarəsinə tabeli Laçın rayon Tarix-Diyarşünaslıq Muzeyi və Sumqayıt şəhər General M.Əsədov adına İnteqrasiya təlimli internat tipli gimnaziyanın təşkilatçılığı ilə 26 avqust - Laçın şəhəri günü münasibətilə "Azad Laçın" adlı tədbir keçirilib. Öncə vətənimizin azadlığı uğrunda canlarından keçən bütün şəhidlərin əziz xatirəsi bir dəqiqəlik sükutla yad edilib, Azərbaycan Respublikasının Dövlət Himni səsləndirilib.
Giriş sözü ilə çıxış edən muzeyin direktoru Türkanə Nuruyeva tədbiri açıq elan edib. Sonra Sumqayıt şəhər General M.Əsədov adına İnteqrasiya təlimli internat tipli gimnaziyanın direktoru Qönçə Hüseynli çıxış edərək Laçın şəhəri ilə bağlı xoş xatirələrindən, rayonda aparılan yenidənqurma işlərindən, yüzlərlə laçınlıların öz doğma torpaqlarına dönüşündən söhbət açıb. Daha sonra gimnaziyanın Tərbiyə işləri üzrə direktor müavini Alidə Məmmədova isə Laçın şəhər günü münasibətilə bütün laçınlıları təbrik edib və üçrəngli bayrağımızın respublikamızın bütün guşələrində olduğu kimi, işğaldan azad edilmiş torpaqlarımızda da əzəmətlə dalğalandırdığı üçün Müzəffər Ali Baş Komandan İlham Əliyevə və onun rəhbərliyi ilə 44 günlük Vətən müharibəsində şücaət göstərən Azərbaycan Ordusuna, şəhid və qazilərimizə minnətdarlığını bildirib. Laçın Dövlət Rəsm Qalereyasının direktoru Xaliq Dünyamalıyev çıxışı zamanı Laçın şəhərinin tarixindən, erməni vandalizmi tərəfindən dağıdılmış tarixi- mədəni abidələrdən və qələbədən sonra həyata keçirilən genişmiqyaslı bərpa, yenidənqurma işlərindən məlumat verib.
Tədbirin bədii hissəsində gimnaziyanın şagirdlərindən Əlirza Nəsrəddinli, Dərya Hüseynli, Nuray Abdullayeva, Nəzrin Dadaşlı, Zəhra Hüseynli, Nigar Hüseynova, Zəhra Hacıyeva və başqalarının ifasında Laçın şəhərinin qayıdışına həsr olunmuş şeirlər və vətənpərvərlik mövzusunda mahnılar dinlənilib.
Sonda qonaqlar muzeyin fondunda saxlanılan eksponatlarla tanış olublar.
İlhamə Məhəmmədqızı
Xəbərdən istifadə edərkən istinad etmək vacibdir.
