Yay aylarında şəhərimizdə hər kəs istirahətin fərqli yollarını axtarır. Kimi çimərliklərə üz tutur, kimi velosiped sürür, kimi də parklardakı attraksionlarda əylənir. Son zamanlarda istər böyüklər, istərsə də gənclər tərəfindən çox sevilən və istifadə edilənlər sırasına elektrik skuterlər xüsusi yer tutur. Bəziləri bu skuterləri əyləncə məqsədi ilə istifadə etsə də, ondan mənzil başına çatmaq üçün vasitə kimi istifadə edənlərin də sayı az deyil. Tıxaclarda vaxt itirmək istəməyən, gedəcəkləri ünvana daha tez çatmaq istəyən bəzi insanlar ondan nəqliyyat vasitəsi kimi istifadə edir.
Bəs bu skuterlərdən istifadə neçəyə başa gəlir?
Xeberle.com olaraq, Sumqayıtda yerləşən skuterlərin icarəsi məkanlarını və qiymətlərini araşdırdıq.
Sumqayıtda olduğunuz əraziyə ən yaxın haradan skuter tapmaq olar sualına cavab axtarırsınızsa, "Jet" tətbiqi sizə yardım edəcək. Belə ki, tətbiqi Play Store-dən yükləyib qeydiyyatı tamamladıqdan sonra proqram sizin olduğunuz əraziyə ən yaxın elektrik skuterlərin olduğunu göstərir.
Bu skuterlərin icarə qiyməti 1 saat üçün 5 AZN-dir. Tətbiq skuterlərdən bir neçə dəqiqəlik istifadə etmək istəyənləri də unutmayıb. Dəqiqə üzərinə hesablanan qiymətlər müxtəlifdir, belə ki, abunə olan şəxslər dəqiqə hesabına 10 qəpik ödədiyi halda, abunə olmayanlar buna görə 50 qəpik ödəyir.
Jet tətbiqində əhalinin istifadəsinə verilən skuterlərin əksəriyyəti "Ninebot Max Pro” skuterlərdir ki, bunların sürətləri 25-35 km/saat arasında dəyişir. Skuterlərin elektrik ilə çalışdığını nəzərə alsaq, tətbiq sizə yaxın ərazidə yerləşən bu skuterlərin hər birinin nə qədər enerjisinin qaldığını və qalan enerji ilə neçə dəqiqə, neçə km/saat ilə istifadə etməyin mümkünlüyünü göstərir.
Bəs tətbiqdən istifadə edə bilməyənlər skuterləri necə icarəyə götürə bilər?
Siz skuter icarəyə götürmək üçün scoorent.az-a müraciət edə bilərsiniz.
Bu ofis Bakıda yerləşdiyinə görə, Sumqayıta yalnız gündəlik olaraq skuterlər kirayə verirlər. 1 günlük skuter kirayəsi isə 25 AZN təşkil edir.
Kirayə üçün digər bir məkan isə scooter way-dir. Scooter way-in Sumqayıt filialına yaxınlaşan vətəndaşlar 15 dəqiqəsi 2 AZN-dən başlayan qiymətlərlə skuterləri kirayələyə bilərlər. Müxtəlif markalı skuterlərin sakinlərin istifadəsi üçün verildiyi bu məkanda Xiaomi 365M (30km/saat) skuterinin 1 saatlıq istifadə qiyməti 5 azn, X8 (25 km/saat) skuterinin 1 saatlıq istifadə qiyməti 6 azn, Ninebot (25-30 km/saat) skuterinin 1 saatlıq istifadə qiyməti 7 azn, Ninebot (30-35 km/saat) skuterinin 1 saatlıq istifadə qiyməti isə 9 azn-dir. Scooter way-də bəzən kampaniyalar təşkil edilir. Kampaniyalar zamanı skuterlərdən istifadə etmək istəyən tələbələrə, saat 18:00-a qədər ofisə yaxınlaşan digər şəxslərə 1 AZN endirim edilir.
Sosial şəbəkələr vasitəsi ilə də skuterləri icarəyə götürə bilərsiniz. Scooter.sumqayit Instagram hesabı vasitəsilə Nəsimi adına Mədəniyyət və İstirahət parkında skuterləri kirayələmək mümkündür. Burada 30 dəqiqə istifadə 5 AZN, 1 saat istifadə 8 AZN, 2 saat istifadə isə 15 AZN-dir.
Aygün İsmayılova
Xəbərdən istifadə edərkən istinad etmək vacibdir.
