Azərbaycanın iqtisadiyyat və sənaye naziri Şahin Mustafayevin növbəti vətəndaş qəbulu bu gün Sumqayıt şəhərində keçirilib. İqtisadiyyat və Sənaye Nazirliyindən verilən məlumata görə, qəbulda Abşeron rayonundan və Sumqayıt şəhərindən olan vətəndaşlar iştirak ediblər.

Qəbula gələn vətəndaşlar sahibkarlıq fəaliyyəti, güzəştli kreditlərin verilməsi, istehsal, emal və xidmət sahələrinin yaradılması, istehlakçı hüquqlarının müdafiəsi, sosial və s. məsələlərlə bağlı müraciət ediblər. Ş.Mustafayev müraciətləri dinləyib, Nazirliyin səlahiyyətlərinə aid məsələlərin operativ həlli üçün Nazirliyin müvafiq strukturlarının rəhbərlərinə tapşırıqlar verib. Vətəndaşların bir sıra müraciətləri yerindəcə həll edilib. Nazirliyin səlahiyyətlərinə aid olmayan məsələlərlə bağlı müraciətlər isə baxılması və müvafiq tədbirlərin görülməsi məqsədilə aidiyyəti qurumlara çatdırılmaq üçün qeydiyyata alınıb.

Qəbula gələn sahibkarların heyvandarlığın inkişafı, iri taxılçılıq və fermer təsərrüfatlarının, turizm, un və qənnadı məmulatları, plastik tara, şüşədən dekorativ məhsullar istehsalı sahələri, logistika mərkəzinin yaradılması və s. sahələrlə bağlı təklifləri dinlənilib, sahibkarlarla müzakirələr aparılıb, investisiya layihələrinin maliyyələşdirilməsi barədə müvafiq göstərişlər verilib.

Qəbulda ümumilikdə 70-dən çox vətəndaş iştirak edib (apa.az)