İşləyən və övladlarının vaxtlarını səmərəli keçirməsini istəyən valideyinlərin əksəriyyəti bağçalara üz tutur. Dövlət müəssisələri ilə yanaşı, özəl bağçalara yol alanların da sayı az deyil. Sumqayıtda hazırda bir neçə özəl bağça fəaliyyət göstərir.Bəs özəl bağçalarda fidanlar üçün hansı şərait yaradılıb? Orada tələb və təklif, qiymət və keyfiyyət bir-birinə nə dərəcədə adekvatdır? Ümumiyyətlə özəl bağçaların xidmətləri orta statistik sumqayıtlı üçün nə qədər əlçatandır?
Xeberle.com olaraq, Sumqayıtda yerləşən "Aynuracademy", "Kaspi", "Ləma" və EDUGrade Təhsil Mərkəzinin mini bağçasının qiymətlərini sizlər üçün maraqlandıq.
- "Aynuracademy"də uşaqların qəbulu 1-6 yaş aralığındadır. Bağçada 3 bölmə - Azərbaycan, rus və ingilis dilli bölmələr fəaliyyət göstərir. Uşaqlar gündə 5 dəfə qida ilə təmin olunur. Bununla yanaşı, onlar hər yaş qrupuna uyğun məşğələlərə cəlb olunur. İstirahət zamanı isə bağçanın həyətyanı sahəsində dincəlirlər. Bağçada rus dili, ingilis dili və şahmat dərsləri qrup məşğələləri keçirilir.
"Aynuracademy"nin ödənişi isə Azərbaycan bölməsi üzrə aylıq 250 AZN, rus bölməsi üzrə 300 AZN, ingilis bölməsi üzrə isə 350 AZN-dir.
Həmçinin bağçanın Sumqayıt daxili fəaliyyət göstərən avtobus xidməti var. Bu xidmət əlavə olaraq 70 AZN-dir.
- "Kaspi" uşaq bağçası həftənin 5 gün səhər 9:00-dan axşam 18:00-dək fəaliyyət göstərir. Gün ərzində 4 dəfə qidalanma, həkim müayinəsi olur. Həftə ərzində uşaqlara proqram şəklində müxtəlif metodiki dərslər, zehni məşğələlər, rəsm, musiqi, rəqs, şahmat, üzgüçülük keçirilir. Dərs vəsaitləri bağça tərəfindən verilir. İl ərzində müxtəlif gəzinti və tədbirlər təşkil olunur. Uşaq qəbulu 2 yaş 10 aylıqdan etibarən başlayır.
Bağçanın aylıq ödənişi Azərbaycan bölməsi üzrə 400, rus bölməsi üzrə isə 450 manat təşkil edir
- "Ləma" uşaq bağçasında qəbul 2 yaşdan başlayır. Bağça həftə içi 5 gün saat 08:30-dan 18:00-a kimi fəaliyyət göstərir. Bağçada 2 bölmə - Azərbaycan və rus bölmələri mövcuddur. Onlayn kamera daim aktivdir. Aylıq ödəniş 400 AZN-dir.
"EDUGrade Təhsil Mərkəzi"ndə 2, 3, 4 və 5 yaşlı uşaqlar üçün "Mini Bağça və Erkən İnkişaf proqram mövcuddur. Mini Bağça həftədə 5 gün olmaqla 2 növbəlidir. I növbə dərs saatı 09:00-13:00, II növbə dərs saatı 14:00-18:00-a qədərdir.
Mini Bağçada I növbə üçün aylıq ödəniş 120 AZN, Erkən inkişaf aylıq ödəniş 55 AZN-dir.
Mini Bağça və Erkən inkişaf proqramına əyləncə və oyun saatı, əyləncəli rəsm dərsləri, meyvə və çay saatı, qidalanma, nitqin inkişafı, ilkin riyazi biliklər, kiçik motorikanın inkişafı, quraşdırma və aplikasiya dərsləri daxildir.
Hazırda bağçaya 1 və ya 2 uşaq yazdıranlar üçün xüsusi endirimlər mövcuddur.
Aygün İsmayılova
Xəbərdən istifadə edərkən istinad etmək vacibdir.
