Sumqayıtda "Bakı Qeyri-Hökumət Təşkilatlarının Resurs və Təlim Mərkəzi" İctimai Birliyi tərəfindən "Regionlarda ictimai iştirakçılığın təmin olunması və ictimai nəzarətin gücləndirilməsi" layihəsi üzrə ictimai müzakirə təşkil olunub.
Xeberle.com məlumat verir ki, layihə Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maliyyə dəstəyi ilə həyata keçirilir.
Heydər Əliyev Mərkəzində olan müzakirədə ilk olaraq layihənin rəhbəri, İB-nin sədri Rauf Zeyni tədbiri açıq elan edərək, qonaqları salamlayıb, Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinə öz minnətdarlığını bildirib və layihənin əsas məqsəd və vəzifələri, əhəmiyyəti barədə məlumat verib. Daha sonra çıxış edərək vətəndaşların dövlətin idarə olunmasında iştiraka cəlb edilməsi, mərkəzi və yerli icra hakimiyyəti və yerli özünüidarəetmə orqanlarının fəaliyyətinə ictimai nəzarətin həyata keçirilməsi, mərkəzi və yerli icra hakimiyyəti və yerli özünüidarəetmə orqanları ilə ictimaiyyət arasında səmərəli qarşılıqlı fəaliyyətin təşkili, mərkəzi və yerli icra hakimiyyəti və yerli özünüidarəetmə orqanlarının fəaliyyətində aşkarlığın və şəffaflığın təmin olunması, dövlət siyasətinin formalaşması, həyata keçirilməsi və qərarların qəbulu zamanı ictimai rəyin və vətəndaşların qanuni maraqlarının nəzərə alınması, əsas insan və vətəndaş hüquqlarının müdafiəsindən ibarət olmasını Azərbaycan Respublikası Milli Məclisinin Səhiyyə, Elm və Təhsil komutələrinin üzvü, deputat Müşfiq Məmmədli vurğulayıb.
Tədbirdə Abşeron, Xızı, Sumqayıt bölgə üzrə axundu Hacı Rauf Sərdarov, Sumqayıt Ağsaqqallar Şurasının sədri Təbrik Quliyev, Sumqayıt şəhər icra hakimiyyətinin nümayəndəsi Mehriban Nəcəfova, Sumqayıt şəhər İcra Hakimiyyəti yanında İctimai Şuranın sədri Hümbət Quliyev, "Şöhrət” ordenli şair-pedaqoq Ofelya Babayeva, dövlət qurumlarının, mərkəzi və yerli icra hakimiyyəti və yerli özünüidarəetmə orqanlarının nümayəndələri, həmçinin KİV və mətbuat nümayəndələri iştirak edib.
Sonda tədbirdə ictimai iştirakçılıq haqqında təqdimat nümayiş etdirilib, diskussiya olub, həmçinin regionlarda ictimai iştirakçılığın gücləndirilməsi üçün təkliflər dinlənilib.
Xəbərdən istifadə edərkən istinad etmək vacibdir.
