Son 6 ayda ümumilikdə 10 min ağac əkilib 
Aprelin 18-də «Azərikimya» İstehsalat Birliyinin müəssisələrində növbəti şənbə iməciliyi keçirilib. Birlikdən Xeberle.com-a verilən məlumata görə, bu dəfəki şənbə iməciliyinə kimyaçılarla birgə SOCAR-ın "Azəriqaz” İstehsalat Birliyinin 80, Ekologiya İdarəsinin isə 50 nəfər əməkdaşı qatılıb.
İməcilikdə Etilen-polietilen zavodundan, Təmir-tikinti İdarəsindən və Birliyin İdarəetmə aparatından ümumilikdə 500 nəfər əməkdaş iştirak edib. İştirakçılar «Azərikimya» İB-nin xüsusi ayrılmış ərazilərində ümumilikdə 1350 ədəd olmaqla  - 1200 ədəd şərq çinarı, nar, melya, həmişəyaşıl sərv, şam, əncir, ərik, gilanar, badam, xurma və digər ağaclar əkiblər.
İməcilik zamanı həmçinin Etilen-polietilen zavodunun bütün istehsalatlarının ərazisində ümumilikdə iki hektara yaxın sahə alaq otlarından təmizlənib, əvvəlki iməciliklər zamanı əkilmiş minlərlə ağaca aqrotexniki qulluq göstərilib, dibləri bellənib, gövdələri əhənglənib, abadlıq işləri aparılaraq bardürlər rənglənib. Qeyd edək ki, ötən ilin payız iməciliklərindən bu yana Birlik ərazilərində kimyaçılar tərəfindən 10 min ədədə yaxın müxtəlif növ ağac əkilib.
Sumqayıtın sənaye zonasında ekoloji mühitin yaxşılaşdırılmasına və yaşıllığın artırılmasına xidmət edən iməciliklərin aprel ayının sonuna qədər davam etdirilməsi nəzərdə tutulub.
Xeberle.com