Azərbaycanın ümumtəhsil məktəblərində yeni dərs ilinin başlanması ilə əlaqədar uşaq və yeniyetmələrin iştirakı ilə yol-nəqliyyat hadisələrinin qarşısının alınması və ümumtəhsil məktəblərində şagirdlərə təhlükəsiz davranış vərdişlərinin aşılanması məqsədi ilə Daxili İşlər Nazirliyinin müvafiq göstərişinə əsasən respublika ərazisində "Diqqət, uşaqlar” adı altında hərəkətin təhlükəsizliyi aylığı keçirilir.
Xeberle.com-un məlumatına görə, bu istiqamətdə Daxili İşlər Nazirliyinin Baş Dövlət Yol Polisi İdarəsi (BDYPİ) və Sumqayıt şəhər Polis İdarəsinin Dövlət Yol Polisi Şöbəsinin əməkdaşları tərəfindən Abşeron-Xızı Regional Təhsil İdarəsinin tabeliyində fəaliyyət göstərən Sumqayıt şəhər 7 nömrəli tam orta məktəbdə hərəkət iştirakçılarının məlumatlandırılması məqsədilə maarifləndirici tədbir təşkil olunub.
Əvvəlcə Azərbaycanın Dövlət Himni səsləndirilib və şəhidlərimizin əziz xatirəsi bir dəqiqəlik sükutla yad edilib.
Tədbirdə çıxış edən BDYPİ-nin rəsmisi polis polkovnik-leytenantı Mübariz Ağayev qeyd edib ki, bu cür maarifləndirici tədbirlərin keçirilməsində əsas məqsəd şagirdləri yol hərəkəti təhlükəsizliyi qaydaları ilə tanış etməkdir. O, şagirdlərə yol nişanları, işıqforlar və piyada keçidlərinin əhəmiyyətindən söhbət açıb, nişanlardan düzgün istifadə qaydaları haqqında məlumat verib.
Abşeron-Xızı Regional Təhsil idarəsinin əməkdaşı Gülbahar Haqverdiyeva, məktəbin direktoru Nuranə Hümbətova tədbirin əhəmiyyətindən danışıblar.
Toplantının sonunda polis əməkdaşları tərəfindən şagirdlərə təhlükəsizlik qaydaları əyani şəkildə izah olunub və onlara tövsiyələr verilib.(Report)
Xəbərdən istifadə edərkən istinad etmək vacibdir.
