Aprelin 22-də «Azərikimya» İstehsalat Birliyində Bakı Beynəlxalq Multikulturalizm Mərkəzinin xətti ilə ”Azərbaycan Multikulturalizmi” mövzusunda səyyar seminar-mühazirə keçirilib. Birliyin Mətbuat xidmətindən Xeberle.com-a verilən məlumata görə, 

Kimyaçılarla bərabər YAP Sumqayıt şəhər təşkilatının Gənclər şurasının üzvlərinin, Şəhər Bələdiyyəsinin nümayəndələrinin və Sumqayıt Dövlət Universitetinin tələbələrinin də iştirak etdiyi seminarda qeyd olunub ki, multikulturalizmin həyat tərzinə çevrildiyi Azərbaycanın dünyaya tolerantlıq nümunəsi olaraq daha geniş tanıdılmasının vacibliyini, eləcə də ayrı-ayrı ölkələrdəki müxtəlif multikultural modellərə xas fəlsəfi, sosial, siyasi və digər aspektlərin Azərbaycan reallığında təhlili və təşviqinin əhəmiyyətini nəzərə alaraq Azərbaycan Respublikası Prezidentinin 15 may 2014-cü il tarixli Fərmanı ilə yaradılan Bakı Beynəlxalq Multikulturalizm Mərkəzi ötən bir il ərzində azərbaycançılıq məfkurəsinə uyğun olaraq tolerantlığın, mədəni, dini, linqvistik müxtəlifliyin qorunmasının təmin edilməsi, habelə Azərbaycanı dünyada multikulturalizm mərkəzi kimi tanıdılması və bunun dünya siyasətinə dəyərli bir töhfə olaraq təqdim edilməsi isitiqamətində yetərincə əhəmiyyətli təşəbbüslər irəli sürülüb, mühüm addımlar atıb.

Sivilizasiyaların qovuşuğunda yerləşən Azərbaycanın zəngin mədəni-mənəvi irsə və tolerantlıq ənənələrinə malik olması danılmaz bir həqiqətdir və mövcud milli-mədəni müxtəliflik, etnik-dini dözümlülük mühiti respublikamızı çoxmillətli, çoxkonfessiyalı diyar kimi dünya miqyasında mədəniyyətlərarası dialoqun bənzərsiz məkanına çevirmişdir. Bu baxımdan ölkəmizdə bu gün mədəni, linqvistik, etnik rəngarəngliyin qorunmasına yönəldilən və uğurla həyata keçirilən dövlət siyasəti multikulturalizm sahəsində əsrlərdən bəri toplanmış böyük tarixi təcrübənin xüsusi qayğı ilə əhatə olunmasına, zənginləşdirilməsinə, cəmiyyətdə bu istiqamətdə qazanılmış unikal nailiyyətlərin beynəlxalq aləmdə təbliğinin gücləndirilməsinə zəmin yaradıb.

Vurğulanıb ki, Azərbaycan Respublikası Təhsil Nazirliyi tərəfindən təsdiq olunan

 "Azərbaycan Multikulturalizmi” proqramına uyğun olaraq Bakı və Sumqayıt şəhərlərində, o cümlədən Azərbaycanın müxtəlif regionlarında il boyu  "Azərbaycan Multikulturalizmi: səyyar dərslər” layihəsi çərçivəsində təqdimat və seminarlar keçirilir. 

Böyük maraqla qarşılanan tədbirin sonunda dinləyicilərin bir sıra sualları cavablandırılıb, yaradılmış normal şəraitə görə Birlik rəhbərliyinə minnətdarlıq ifadə olunub.

Xeberle.com