Gün ərzində Sumqayıtdan çox sayda sakin Bakı şəhərinə yollanır. Müxtəlif səbəblərdən paytaxta üz tutanların ən çox istifadə etdiyi yollardan biri də Saray qəsəbəsindən keçir. Lakin buna baxmayaraq həmin ərazidə - Hüseyn Cavid küçəsi 12 ünvanında avtomobillərin normal hərəkəti müşkülə çevrilir. Bizə daxil olan növbəti şikayət də məhz bu ərazi ilə bağlıdır. Həmin ünvanda yaşayan, davamlı o küçədən istifadə edən sakinlər yolun bərbad vəziyyətdə olmasından şikayət edirlər.
Sakinlər bildirirlər ki, ərazidə yol o vəziyyətdədir ki, taksi sifariş etdikdə belə sürücülər gəlmək istəmir.
"Saray qəsəbəsi, Hüseyn Cavid küçəsi 12 ünvanında yollara bir çarə tapılmır. Artıq 1 ildir ki, yollar keçilməzdir, biz çox əziyyət çəkirik. Hər gün ərazidəki su boruları partlayır, təmir edilməsinə baxmayaraq, 3 gündən bir borular deşilir və su yollara axır. Belə olan halda nəinki avtobus sürücüləri, heç taksi sürücüləri sifariş zamanı əraziyə daxil olmaq istəmirlər”, - deyə sakinlər şikayətlərində qeyd ediblər.
Mövzu ilə bağlı Xeberle.com-a açıqlamasında Saray qəsəbəsi İcra Nümayəndəsi bildirib ki, Saray qəsəbəsində yolların təmiri nəzərdə tutulur.
"Saray qəsəbəsi yollarının yaxın gələcəkdə təmiri nəzərdə tutulur. Dəqiq vaxt bilinməsə də, bu proses icra olunacaq”, - deyə o vurğulayıb.
Aygün İsmayılova
Xəbərdən istifadə edərkən istinad etmək vacibdir.
