İctimai nəqliyyatda olan problemlər hər zaman insanları narahat edən əsas məsələlərdən biridir. Zaman-zaman istər sosial şəbəkələrdə, istərsə də elə ictimai nəqliyyatın özündə belə narazılıqlara şahid oluruq.
Artıq bir müddətdir ki, Sumqayıtdan Bakıya gediş-gəlişdə çətinliklər müşahidə edilir. Vətəndaşların bəziləri avtobusla, bir qismi "manatlıq” adalanan taksilərlə, digər bir qismi isə sürət qatarı ilə gedir. Bu dəfə müzakirə edəcəyimiz əsas mövzu Sumqayıtdan Bakıya gedən avtobusların çatışmaması ilə bağlı olacaq. Müşahidələrimizə əsasən deyə bilərik ki, şəhər avtovağzalında uzun müddətdir ki, Bakıdan Sumqayıta və əks istiqamətə gedən avtobuslar tapılmır. Şəhərdə ictimai nəqliyyat normal hərəkət etmədiyindən insanlar şəxsi avtomobillərə və "1 manatlıq taksi"lərə üstünlük verirlər. Bu da Bakı-Sumqayıt yolunda sıxlığa səbəb olur. Belə qənaətə gəlmək olar ki, artıq illərdir Sumqayıt Avtovağzalında baş verən neqativ hallar barədə heç bir tədbir görülmür. Necə deyərlər, burada biabırçı vəziyyət düzəlmir ki, düzəlmir. Bu baxımdan, Sumqayıt Avtovağzalı bir çox ucqar rayonlarımızın avtovağzallarından geridə qalır desək yanılmarıq.
SƏRNİŞİNLƏR NARAZIDIR...
Saytımıza daxil olan şikayətlər əsasında, Xəbərlə.com-un əməkdaşı sübh tezdən müşahidələr aparmaq üçün avtovağzal ərazisinə üz tutub. Sakinlər saytımıza bildirib ki, avtovağzalda yetərincə nəqliyyat vasitəsi olmadığından digər ərazilərdən gedən avtobuslara üz tutmaq məcburiyyətində qalırlar. Hətta elə olur ki, sərnişinlər saatlarla avtovağzalda avtobus gözləməyə məcbur qalır. Yaranmış sıxlığı aradan qaldırmaq üçün isə heç bir addım atılmır. Şəhər sakinləri Xeberle.com-a danışaraq vəziyyətin xaotik olduğunu dedilər. Sumqayıt şəhərindən hər gün Bakıya işə gedən Ramin Novruzov deyir ki, illərdir problem olsa da, təəssüf ki bu günə kimi heç nə dəyişməyib: "Hər gün işə gecikirik. İş tapmaq asandır? Bizi qovsalar kim iş verəcək? Mikroavtobusları yığışdırıblar, yaxşı ediblər. Amma bununla iş bitmir axı. Bəs, camaat evinə, işinə necə getsin?
Digər bir şəhər sakini Şəhla Məmmədova isə bir müddətdir ki, Bakıya getmək üçün qatardan istifadə edir. Lakin, qatarda olan dözülməz insan sıxlığı onu da təngə gətirib: "Bu gün Bakı-Sumqayıt qatarında əməlli-başlı xaos idi. Xırdalandan Bakıya az qala hamı üst-üstə gəlib. Bu vəziyyət hara kimi gedəcək, bilən yoxdur”.
BAKIYA ÇÖRƏK VƏ TƏHSİL ARXASINCA GEDƏNLƏR GEDƏCƏKLƏRİ ÜNVANA GECİKİRLƏR...
Hər il minlərlə sumqayıtlı gənc Bakı universitetlərinə qəbul olunur. Bundan əlavə Sumqayıtdan Bakıya işə gedənlərin də sayı heç də az deyil. Tələbələr dərslərə vaxtında yetişmək üçün həftənin 5 günü sübh tezdən oyanır. Buna baxmayaraq, onlar avtobusa minə bilməməklə yanaşı, Bakı-Sumqayıt yolunun tıxacı ilə də qarşılaşır. Daha sonra avtobus dəyişməli və ya metroya minməli olurlar. Bu da sərnişinlərin gedəcəyi ünvana gecikməsinə səbəb olur. Qanunsuz yolla fəaliyyət göstərdikləri üçün xətdən uzaqlaşdırılan və fəaliyyətlərinə qadağa qoyulan mikroavtobuslar isə gizli yollarla öz işlərinə davam edirlər. Şəhər sakinləri deyirlər ki, sərnişin sıxlığını görən fürsətçi sürücülər isə qiymətləri artırırlar.
BAKI-SUMQAYIT YOLU İLƏ BAĞLI VACİB YENİLİK
Məlum olduğu kimi, Bakı-Sumqayıt yolundan yalnız Sumqayıt sakinləri deyil, Masazır, Xırdalan, Novxanı və Binəqədiyə gedən sakinlər də istifadə edir. Bu yolda pik saatlarda tıxac qaçılmazdır. İctimai nəqliyyatın, eləcə də yanğın söndürmə və təcili tibbi yardım maşınları üçün ən arzuolunmaz yol sayılan Bakı-Sumqayıt şossesinin mövcud vəziyyətdən çıxış yolları axtarılır. Təkliflər gerçəkləşərsə, həmin yolla hərəkət edən ictimai nəqliyyat, operativ nəqliyyat vasitələri daha rahat şəkildə hərəkət etmiş olar. Onu da qeyd edək ki, artıq Bakı-Sumqayıt yolunda avtobus zolağı çəkilib. Zolağın yolun "Şamaxinka” adlanan ərazidən Masazır dairəsinədək olan hissəsini əhatə edəcəyi bildirilir. Artıq yolun böyük hissəsində xüsusi zolağın çəkilişi başa çatdırılıb. İşlər tam başa çatdıqdan sonra avtobus zolağına daxil olan minik avtomobilləri inzibati qaydada cərimələnəcək. Avtobus zolaqları müasir zamanın tələbidir və onların çəkilməsi müsbət addımdır. Lakin, avtobus zolağına daxil olan qeyri-nəqliyyat vasitələrinə qarşı sərt tədbirlərin görülməsi labüddür. Sürücülər və sərnişinlərlə söhbətimizdən belə başa düşdük ki, zolaqların çəkilməsi heç də tıxacın olmayacağı anlamına gəlmir. Bu əksinə magistral yolu daha da sıxlaşdıraraq, tıxacın uzunluğunu artıracaq. Ümid edirik ki, doğma şəhərimizdə illərdir davam edən Bakı-Sumqayıt arasında olan nəqliyyat çatışmazlığı tezliklə öz həllini tapacaq və sakinlərimiz, eləcə də şəhərimizə təşrif buyuran qonaqlarımız tez bir zamanda gedəcəkləri ünvana çata biləcəklər.
Elşən Yəhyayev
Xəbərdən istifadə edərkən istinad etmək vacibdir.
