Son zamanlar Mənzil Kommunal Təsərrüfat Birliklərinin fəaliyyəti vətəndaşları narazı salır. Belə ki, üzərlərinə düşən öhdəlikləri lazımınca yerinə yetirmirlər. Məsuliyyətsizlik nümayiş etdirirlər. Hər kəsə bəllidir ki, hər rayon ərazisində bir neçə Mənzil Kommunal İstismar Sahələri var. Görünür ki, yaşayış binalarının girişində baş verən natəmizlik Sumqayıt binalarından da yan keçmir.
Xəbər verdiyimiz kimi, dünən Sumqayıt şəhəri, general Məhəmməd Əsədov küçəsində yerləşən beşmərtəbəli yaşayış binasında yanğın olub. Hadisə bina 7, blok 1-də qeydə alınıb.
Dərhal hadisə yerinə Dövlət yanğından mühafizə hissəsinin yaxınlıqda olan qüvvələri cəlb olunub. Yanğın yaşayış binasının giriş hissəsində qeydə alınıb. İlkin məlumata görə, binanın blokunda məişət tullantılarının alışması yanğına səbəb olub.
Hadisədən sonra bina sakinləri Xeberle.com-a müraciət edib. Sakinlər müraciətlərində bildirib ki, binanın bloku baxımsız olduğuna görə yanğın hadisəsi olub. Sakinlər bloklarının baxımsız olduğundan narazıdırlar:
"Təmir zamanı zibil dolu meşok, taxta, plastik turba blokun girişinə yığılır. Bundan əlavə, elektrik naqilləri də baxımsız vəziyyətdədir. Belə getsə, bir gün bunlardan da qısqapanma olacaq. Blokun vəziyyəti acınacaqlı vəziyyətdədir. Təəssüf ki, nə JEK, nə də digər aidiyyatı orqanları nəzarət etmir. Dünən baş verən yanğından sonra bloku bürüyən tüstü binadakı bir çox evlərə ziyan vurub. Hazırda tüstüdən evlərdə qaralma baş verib. Evlərə tüstünün keçməməsi üçün FHN əməkdaşları blokun bütün pəncərələrini sındırıb ki, tüstü çölə yayılsın. Yanğından sonra elektrik naqilləri də əriyib”.
Deyilənlərdən aydın olur ki, nə bələdiyyə, nə icra hakimiyyəti, nə də "JEK” binaların girişlərinin təmizlənməsi ilə maraqlanır. Dünən sözügedən binada baş verən yanğın da buna əsas verir. Sakinlər məişət tullantılarının təmizlənməməsi, nəticədə natəmizlik hökm sürdüyünü, sahibsiz küçə itlərinin ərazidə məskən saldığını, siçovullar oylağına çevrildiyini qeyd edirlər. Sakinlər problemin tezliklə həllini xahiş edirlər.
Elşən Yəhyayev
Xəbərdən istifadə edərkən istinad etmək vacibdir.
