Xəbər verdiyimiz kimi, dünən Sumqayıt şəhəri, general Məhəmməd Əsədov küçəsində yerləşən beşmərtəbəli yaşayış binasında yanğın olub. Hadisə bina 7, blok 1-də qeydə alınıb.
Hadisədən sonra bina sakinləri Xeberle.com-a müraciət edib. Sakinlər müraciətlərində bildirib ki, binanın bloku baxımsız və zibillə dolu olduğuna görə yanğın hadisəsi olub. Sakinlər bloklarının baxımsız olduğundan narazıdırlar:
"Təmir zamanı zibil dolu meşok, taxta, plastik turba blokun girişinə yığılır. Bundan əlavə, elektrik naqilləri də baxımsız vəziyyətdədir. Belə getsə, bir gün bunlardan da qısqapanma olacaq. Blokun vəziyyəti acınacaqlı vəziyyətdədir. Təəssüf ki, nə JEK, nə də digər aidiyyatı orqanları nəzarət etmir. Dünən baş verən yanğından sonra bloku bürüyən tüstü binadakı bir çox evlərə ziyan vurub. Hazırda tüstüdən evlərdə qaralma baş verib. Evlərə tüstünün keçməməsi üçün FHN əməkdaşları blokun bütün pəncərələrini sındırıb ki, tüstü çölə yayılsın. Yanğından sonra elektrik naqilləri də əriyib”.
Məsələylə bağlı Sumqayıt şəhər Mənzil Kommunal Təsərrüfatı İstehsalat Biriliyi ilə əlaqə saxladıq. Qurumdan Xeberle.com-a verilən məlumata görə, sakinlər yanğının səbəbinə uyğun olaraq aidiyyatı üzrə şikayət etsinlər:
"Pilləkən qəfəslərində yanğın elektrikdən baş verə bilər. Bundan əlavə qaz, su boruları, sayğacları da var. Yaxşı olar ki, sakinlər yanğının səbəbinə uyğun olaraq aidiyyatı üzrə şikayət etsinlər. Bizim MKS-lər yalnız təmizlik işlərinə baxır”.
Elə sakinlərin də şikayəti də təmizliklə bağlıdır. Deyilənlərdən aydın olur ki, nə bələdiyyə, nə icra hakimiyyəti, nə də "JEK” binaların girişlərinin təmizlənməsi ilə maraqlanır. Dünən sözügedən binada baş verən yanğın da buna əsas verir. Sakinlər məişət tullantılarının təmizlənməməsi, nəticədə natəmizlik hökm sürdüyünü, sahibsiz küçə itlərinin ərazidə məskən saldığını, siçovullar oylağına çevrildiyini qeyd edirlər. Sakinlər problemin tezliklə həllini xahiş edirlər.
Elşən Yəhyayev
Xəbərdən istifadə edərkən istinad etmək vacibdir.
