İstefada olan mayor Şamil Əmirli sosial şəbəkə hesabında Xoşqədəm Hidayətqızının ''Səni Axtarıram'' proqramına çıxan və Birinci Qarabağ döyüşlərində iştirak edən Qazax adlı şəxs barədə ilginc faktları açıqlayıb. O qeyd edib ki, Qazaxı prqoramına çıxaran Xoşqədəm Hidayətqızı timsah göz yaşı ilə özünə reytinq qazanır:
"Şəkildə gördüyünüz şəxs, bu gün Xoşqədəmin ''Səni Axtarıram'' verlişində iştirak edən, milliyətcə qazax olan, Özbəkistan vətəndaşı, Sovet dönəmində Sumqayıtda Sovet ordusunda xidmət edən, Qarabağda döyüşlər başlayan zaman türk təəsübkeşliyini əsas tutaraq bizimlə döyüşlərə qatılan, sözün əsl mənasında qorxmaz döyüşçü, hamımızın sadəcə Qazax deyə çağırdığımız Azərbaycanın igid oğlunu görürsünüz. Bu sətirləri yazan isə onun vaxtılə tabor komandiri olmuş, istefada olan mayor Şamil Əmirlidi. Mən bilmirəm kim Qazaxa məsləhət görüb ki, bu verlişə çıxsın. Mən bilsəydim buna imkan verməzdim. Xoşqədəm timsah göz yaşı ilə özünə reytinq qazanır. Qazaxın problemi isə başqadı. Onun sadəcə sənədləri yoxdu. Olan bütün sənədlərini Qarabağda döyüşlər zamanı itirib və yaxud yararsız vəziyyətə düşüb. Əgər normal sənədi olsaydı o heç vaxt ailə problemi çəkməzdi. Oturardı təyyarəyə gedərdi və ailəsini də ziyarət edərdi. Mən bildiyim qədər Qazax valideyinlərinin, yaxınlarının harada yaşadığını bilir və onlarla həmişə əlaqəsi olub. Qazaxı tanıyan biri kimi, onun komandiri olaraq Azərbaycan hakimiyyətindən və Özbəkistan səfirliyindən xahiş edirəm ki, Qazaxı bir vətəndaş olaraq tanıyaq və onu şəxsiyyətini təsdiq edən sənədlərlə təmin edək. Bilsəz o cılız bədənin köksündə hansı ürək döyünür, öz gəncliyini Azərbaycanımız üçün sərf edən bu döyüşçüyə hamımız kömək etməyə borcluyuq. Dostlardan da xahiş edirəm ki, yazını mümkün qədər paylaşsınlar, kim bilir bəlkə kömək etmiş olarıq”.
Elşən Yəhyayev
Xəbərdən istifadə edərkən istinad etmək vacibdir.
