"İslamda cinayətlərlə əlaqəli olaraq qisas institutu mövcuddur. Qisas qaydasına görə, əbəs (günahsız) yerə öldürülmüş şəxsin qəyyumu (qardaşı, atası...) qatili cəzalandırmaq hüququna sahibdir. Eyni zamanda onun qatili bağışlamaq hüququ var."
Bu sözləri ilahiyyatçı Elvüsal Məmmədov deyib.Onun sözlərinə görə, mühüm olaraq qeyd edilməlidir ki, bu qayda rəsmi qurumların tənzimlədiyi və tətbiq etdiyi qaydadır. Fərdlər özbaşına olaraq qisas hökmünü tətbiq edə bilməzlər: "Əks halda özbaşınalıq yaranar, qətl faktlarında ümumiləşdirmə güclənər, subyektiv yanaşmalar din adına qətllərin sayını artırar. Məsələn, Türkiyə, İraq və digər ölkələrdə müşahidə olunan "qan davaları” məhz bu cür özbaşınalığın, qisas hökmünün tətbiqində rəsmi hökumət idarələrinin səlahiyyətinin heçə sayılması nəticəsində ortaya çıxıb. Deməli, İslam nöqteyi-nəzərinə görə, fərdlərin özbaşına qisas almaları qadağandır. Belə ki bir qətl aktı törədildikdə məhkəmə bu işə baxır, qətlin motivi müəyyən edilir, bundan sonra öldürülmüş şəxsin qəyyumuna qatili ya cəzalandırmaq, ya da əfv etmək seçimi verilir. Qəyyumun seçiminə uyğun olaraq, məhkəmə hökmü icra edir."
İlahiiyatçı qeyd edib ki, Quranın qisasla əlaqəli ayəsində göstərilir ki, qisasda həm də həyat var: "Bu o deməkdir ki, insan başqasını öldürmədən qabaq düşünməli, öldürərsə, özünün də öldürüləcəyini nəzərə almalıdır. Bunu düşünərək fikrindən əl çəkərsə, qisasdan xilas olmuş, deməli, həyatını qoruyur. İslamın qisas hökmünün qoruyucu funksiyası da elə bundan ibarətdir." (Analitik.az)
Xəbərdən istifadə edərkən istinad etmək vacibdir.
