Xəbər verdiyimiz kimi, ümumi istifadədə olan nəqliyyat vasitələri üçün xüsusi hərəkət zolaqlarının təşkili ilə bağlı tədbirlər davam etdirilir. Azərbaycan Yerüstü Nəqliyyat Agentliyindən verilən məlumata görə, Sumqayıtdan Bakı istiqamətində təşkil edilən avtobus zolağının effektivliyi nəzərə alınaraq, eyni zamanda görülən işlərin davamı olaraq əks istiqamətdə də xüsusi avtobus hərəkət zolağının təşkili həyata keçirilir.
Həmin yol sahəsində avtobus zolağının tələbinə uyğun nişanlanma xətləri çəkilir və müvafiq yol nişanları quraşdırılır.
Xeberle.com-un əldə etdiyi məlumata görə, Bakı-Sumqayıt arası xəttə "BakuBus” avtobusları istismara buraxılacaq. Avtobus ancaq Sumqayıt avtovağzalından Bakı avtovağzalına qədər işləyəcək. Bununla da digər qanunsuz işləyən nəqliyyat vasitələrinin qarşısı alınacaq. Hazırda xüsusi hərəkət zolaqlarının çəkilməsi ilə avtobusların xəttə buraxılmasına hazırlıq işləri aparılır.
Qeyd edək ki, Bakı-Sumqayıt yolunda avtobus zolağının çəkilməsi ilə tıxacın qarşısını qismən almaq mümkündür, amma bunu tam təmin etmək mümkün deyil. Sözügedən yolda tıxacın yaranmasına səbəb olan bir çox amil var ki, bunlardan biri də yolun müəyyən hissədən sonra daralmasıdır. Ümid edirik ki, problem köklü şəkildə həllini tapacaq.
Elşən Yəhyayev
Xəbərdən istifadə edərkən istinad etmək vacibdir.
