Sumqayıtda ictimai ayaqyolunun sayının az olması sakinləri narahat edir. Ölkənin 3-cü böyük şəhərində problem özünü qabarıq şəkildə göstərir.
Əhalinin ən çox üz tutduğu parklarda belə ictimai ayaqyolular yox dərəcəsindədir. Xeberle.com-un əməkdaşı mövcud problemlə bağlı şəhərdə müşahidələr aparıb. Məlum olub ki, Sumqayıtda ictimai ayaq yolunun olmaması səbəbindən sakinlər və şəhərimizin qonaqları restoranlara üz tutmaq məcburiyyətindədirlər. Lakin, restoran sahibləri çox vaxt buna imkan vermirlər. Bildirilir ki, obyektlərindəki ayaqyolu yalnız müştərilərin ixtiyarındadır. Müasir dövrdə şəhərimizdə belə probemlə üz-üzə qalmağımız həqiqətən də çox üzücüdür.
61 yaşlı Sumqayıt sakini Fazil Səfərov xəstəliyi səbəbindən tez-tez ayaqyoluna getməli olduğunu bildirib. Tez-tez parka üz tutan Sumqayıtın yaşlı sakini vəziyyətin köklü şəkildə həll olunmasını arzu edir: "İş ondadır ki, mən bir neçə il bundan əvvəl sidik kisəmdən əməliyyat olunmuşam və tez-tez sidiyə getməli oluram. Parka çıxanda həmişə çalışıram ki, çoxlu maye qəbul etməyim".
Müşahidələrimizə əsasən deyə bilərik ki, Sumqayıtda 3 ictimai ayaqyolu fəaliyyət göstərir. Onlardan biri də Nəsimi parkındadır. Sakinlər buranın da çox vaxt işləmədiyini qeyd edirlər. Elə biz də parkda olarkən ayaqyolunun bağlı olduğunu gördük.
Yəgin ki, şəhər rəhbərliyi mədəniyyətin bir göstəricisi olan ictimai ayaqyoluların sayını tezliklə artıracaqlar.
Qeyd: Mövzunu geniş şəkildə davam etdirəcəyik.
Elşən Yəhyayev
Xəbərdən istifadə edərkən istinad etmək vacibdir.
