Elxan Rzayev 1979-cu ildə Sumqayıt şəhərində anadan olmuşdur. 1996-cı ildə Sumqayıt şəhər 23 nömrəli orta məktəbi bitirmişdir. Həvəskar aktyor kimi ilk dəfə Sumqayıtda fəaliyyət göstərən "Cavid" teatrında səhnəyə çıxmışdır. 1996-cı ildə Azərbaycan Dövlət Mədəniyyət və İncəsənət Universitetinə daxil olmuşdur. Tələbəlik illərində Əbdürrəhim bəy Haqverdiyevin "Yeyərsən qaz ətini, görərsən ləzzətini", Nəcəf bəy Vəzirovun "Yağışdan çıxdıq, yağmura düşdük", Cəfər Cabbarlının "Solğun çiçəklər", Anton Çexovun "Təklif" əsərlərində Ələsgər, Əşrəf bəy, Rəhman və Stepan Stepanoviç rollarını ifa etmişdir. Cəfər Cabbarlının "Solmaz yarpaq" ədəbi–musiqili kompozisiyasında Cəfər Cabbarlı obrazını məharətlə yaratmışdır. Tələbə ikən Azərbaycan Milli Dram Teatrında çalışmış, kütləvi səhnələrdə aktyor kimi çıxış etmişdir. Bu illər ərzində teatrın aparıcı artisti, baş rolların mahir ifaçısı kimi teatr ictimaiyyətinin diqqətini özünə çəkmişdir.
2000-ci ildən Bakı Bələdiyyə Teatrının aktyorudur. Cəfər Cabbarlının "Dönüş"ündə Ötgün Zamanbəyli, Cəlil Məmmədquluzadənin "Ölülər"ində İsgəndər, Nazim Hikmətin "Damokl qılıncı"nda Abe, Nəriman Nərimanovun "Nadir şah"ında Rzaqulu obrazlarının ifaçısı kimi yüzlərlə tamaşaçının məhəbbətini qazanıb. Hüseyn Cavidin "İblis"ində Vasif, Arif, Sofoklun "Elektra"sında Arest rollarını oynayıb. İ.Kərimovun "Xəyanətin müsibəti"ndə İmam Hüseyn, Ə.Pəhləvaninin "İnsan və İblis"ində İblis, A.Babayevin "Oğul" tamaşasında II şəhid, A.Məmmədovun "Dəli Domrul"unda Dondar, R.İçərişəhərlinin "Vətənə igidlər gərəkdir" tamaşasında Rüstəm, Ə.Əliyevin "Unutqanlıq qorxunc bəladır"ında II kişi, A.Qurbaninin "Türk sancağı"nda Lütfəli bəy və repertuarında olan onlarca tamaşada baş rollarda çıxış edib. 2018-ci ildə Azərbaycanın əməkdar artisti fəxri adına layiq görülmüşdür.
Xeberle.com-un əməkdaşı Sumqayıtın tanınmış şəxslərindən biri olan, əməkdar artist, teatr və kino aktyoru Elxan Rza ilə həmsöhbət olub:
Obrazlardan hansı sizə daha çox bənzəyir?
Oynadığım obrazlardan mənə ən yaxın olanı dahi dramaturqumuz Cəlil Məmmədquluzadənin "Ölülər" əsərindəki Keyfli İsgəndər obrazıdır.
Son dövrlər film və seriallarımızda söyüşlərdən, jarqon ifadələrdən çox istifadə edilir. Sizcə bu düzgündürmü?
Film və serial bir sənət növü olaraq, eyni zamanda həyat hadisələrini əks etdirir. Amma, bu o demək deyil ki, real həyatda olan ən çirkin bildiyimiz ifadələri və yaxud sözləri filmdə istifadə edəsən. Bu yol verilməzdir. Buna sənəti bacarmayıb, həmin ifadələrlə xal qazanmaq deyilir. Yəni, bu cür münasibətlə tamaşaçı cəlb etmək kökündən yanlışdır. Film və seriallar insanları düşündürməlidir. Tamaşaçıları mənəvi tərəfdən doğru-düzgün istiqamətləndirməlidir. Amma, söyüş və jarqon mahiyyət baxımından həm gənclərin mənəviyyatını korlaryır, həm də zövqsüz söyüşə öyrədilmiş, geniş tamaşaçı kütləsi yaradır. Bunun isə gələcəyi çox təhlükəli olur. Sənət onda sənət olur ki, tamaşaçını öz arxasınca aparır.
Müğənniliklə məşğul olan aktyor və aktrisalar hər zaman olub. Siz nə əcəb belə seçim etmədiniz?
Əslinə qalsa illərdir ki, müğənnilik fəaliyyəti ilə də məşğul olmaq fikrim olub. Sadəcə olaraq, mən hər işə vicdanla yanaşdığıma görə burdada tərəddüd etmişəm. Çünki, müğənnilik sənəti ilə tam ciddi məşğul olmaq üçün də müəyyən səs və ifa texnikasına malik olmaq şərtdir. Söz yox ki, bu gün bir çoxları buna əhəmiyyət vermir. Amma, mən yenə qeyd edirəm ki, bu məsələyə ciddi yanaşıram. Bu illərdə ara-sıra bir iki ifam olub. Hətta, bəyənənlər də çox olub. Professional insanlardan da dəstək almışam. Yaxın illərdə bəlkə məni də müğənni kimi görə bildiniz.
Gənclərdən kinoda və teatrda prespektivinə inandıqlarınızın adını söyləyə bilərsiniz? Onlar kimlərdir?
Konkret olaraq, kimlərinsə adını qeyd edə bilmərəm. Amma onu bilirəm ki, istedadlı gənclərimiz çoxdur. Sadəcə onları düzgün yönləndirmək lazımdır. Əsl istedadlara dəyər verilməlidir. Amma bu gün bizdə bu anlayış çox yanlış dəyərləndirilir. Bəzən elə insanı tanıdıb istedadlı bir şəxs kimi təqdim edirlər ki, təəssüf etməkdən başqa çarə qalmır.
Rejissorlar aktyorlardan yetərincə istifadə edə bilirlərmi?
Əsl rejissorlar tək-tük say hesabıdır. Bu gün bir çox özünə rejissor deyənlər həqiqi sənətə yox, tanışlığa və yaxınlığa qiymət verib, kimlərisə aktyor kimi filmlərə, seriallara çəkirlər. Şübhəsiz ki, bu gün filmlərdə və seriallarda istedadlı aktyor və aktrisalarımız da var. Amma azlıq təşkil edir. Bir aktyor və yaxud aktrisa bir neçə fərqli seriallarda sanki eyni obrazları oynayır. Bu serialdan, başqa seriala dəvət olunduqda obrazlarının xarakterində heç bir fərq olmur. Belə desək, burda həm rejissorun, həm də aktyorun günahı var. Bu haqda daha geniş danışmaq olar. Amma bu problemi dinləyəcək və buna çarə edəcək biri olarsa...
Xarici ulduzlardan kimlərin oyununu çox bəyənirsiniz?
Xarici aktyorlardan oyunlarını və obrazlarını bəyəndiyim çox simalar var. Adlarını qeyd etsəm siyahı uzun olacaq...
Aldığınız məvacib dolanışığınıza yetirmi?
Bir çox ölkələrin sənət adamlarının məvacibi ilə bizim məvacibləri müqayisə edəndə, yerlə göy qədər fərq var. Məsələn, götürək qardaş Türkiyənin aktyorlarının seriallardan aldığı qonorarları..."Kuruluş Osman"serialının baş rol ifaçısı Burak Özçivitin həftəlik 320 min, aylıq isə 1milyon 280 min tl qonorar aldığı bildirilir. Azərbaycan manatına cevirdikdə həftəlik 17-18 min AZN, aylıq isə 71.000 AZN. Təbii ki, digər obrazlar bu məbləğdən daha az qonorarlar alırlar. Amma yenə bizlərlə müqayisədə çoxdur.
Sumqayıtda hansı yenilikləri görmək istərdiniz?
Gözəl şəhərimizdə ailəvi-mədəni istirahət məkanlarının, mərkəzlərinin çox olmasını, bundan əlavə teatrların və teatrlara, tamaşalara gedən insanlarımızın daha çox olmasını istərdim.
Fəaliyyətinizdə ən çox hansı çətinliklərlə qarşılaşmısınız?
İş fəaliyyəti ilə bağlı çətinliklərə qaldıqda iş olan yerdə çətinlikdə olur. Narazılıq da, hətta razılıq da...
Adətən teatr rəhbərliyi ilə münasibətləri gərgin olan aktyorlar çətinliklər yaşayırlar. Buna münasibətiniz necədi?
Mənim teatr rəhbərliyi ilə münasibətim çox gözəldir.
Ümid edirik ki, sizi yormaqdıq. Bizə vaxt ayırdığınız üçün təşəkkür edirik.
Sizə də gələcək işlərinizdə uğurlar arzu edirəm!
Söhbətləşdi: Elşən Yəhyayev
Xəbərdən istifadə edərkən istinad etmək vacibdir.
