"Son zamanlar Sumqayıtda gedən iqtisadi-sosial inkişaf indi Sumqayıtdan deyil, Sumqayıta beyin axınının olmasının işarəsidir”

Sumqayıtda son aylarda aparılan tikinti-quruculuq işləri, yeni layihələr şəhərə yenidən beyin axını cəlb edə biləcəkmi...
Bu məsələ ilə bağlı Xeberle.com adından uzun illər Sumqayıtda ictimai-siyasi işlərdə aktiv gənc kimi yaddaşımızda qalan, iqtisadçı-ekspert Arzu Qafarlıya müraciət etdik. Ekspertlə apardığımız söhbəti oxucularımıza təqdim edirik:

-Arzu müəllim, ümumiyyətlə beyin axını dedikdə nə başa düşürük, nədir beyin axını?

- İstedadlı, bacarıqlı, iхtisaslı mütəхəssislərin öz yaşadığı şəhərdə, ölkəsində, diqqət görməmələri, normal yaşam tərzi qura bilməmələri, bu insanların ölkənin digər şəhərlərinə və хarici ölkələrə miqrasiya etməsi "beyin axını” kimi başa düşülür. Biz bura müxtəlif sahələrdə çalışan ixtisaslı şəxslərin adlarını çəkə bilərik. Məsələn, bu, bir iqtisadçı, jurnalist, həkim, alim, mühəndis və sair ola bilər.

-Ölkəmizdə və doğma şəhərimiz Sumqayıtda "beyin axını” ilə bağlı durum nə yerdədir ?

- Öncəki illərə nəzər yetirsək, görərik ki, ölkəmizdən xarici ölkələrə "beyin axını” var idisə, indi əksinə xarici ölkələrin aparıcı mütəxəssisləri çalışmaq üçün Azərbaycana gəlir. Xarici mütəxəssislərlə yanaşı, vaxtilə işsizlikdən digər ölkələrə üz tutan vətəndaşlarımız hal-hazırda ölkəmizdə çalışmağa can atırlar. Gənclər sektorunda uzun müddət işlədiyim üçün, ətrafımda bu kimi gənclər çox idi. Hal-hazırda isə, belə aktiv gənclərin öz ölkəmizə qayıtmasının marağında olduğunu görürəm. Bu da ondan irəli gəlir ki, istər dövlət qulluğunda, istərsə özəl biznes qurumlarında, savadlı, istedadlı şəxsləri öz ölkəmizdə işlə təmin edirlər. Onlar üçün rahat iş mühiti yaradılır. İşlədiyim özəl sektorda mən bunları görürəm.
Doğma şəhərimiz haqqında isə çox danışmaq olar. Sumqayıt gənclər şəhəridir, bu şəhərdə çox sayda istedadlı, tanınmış şəxslər yetişib. Bu şəxslər ölkəmizdə, xaricdə müxtəlif sahələrdə vəzifə tuturlar, öz işlərini layiqincə yerinə yetirirlər.

"Sumqayıtda son zamanlar gedən iqtisadi-sosial inkişaf, indi Sumqayıtdan deyil, Sumqayıta beyin axınının olmasının işarəsidir”.

2002-2003-cü illərdən, tələbəlik illərimdən, Sumqayıtın ictima-siyasi işlərində aktiv iştirak etmişəm. Bunu özümə borc bilmişəm. Bu illərdə özümə savadlı, istedadlı, yaxşı insanlar, dostlar qazanmışam, tanımışam. Həqiqətən də, Sumqayıtda çox sayda istedadlı, savadlı şəxs vardı və var. Bu tanıdığım gənclərin əksəriyyəti şəhərimizdən kənarda fəaliyyət göstərirlər. Buna görə bir tərəfdən çox təəsüflənirəm, digər tərəfdən də sevinirəm. Təəsüflənirəm onun üçün ki, o zamanlar onlar işsizlikdən əziyyət çəkirdilər, diqqətsizlikdən öz şəhərlərini tərk etmək məcburiyyətində oldular. Sevinirəm ona görə ki, onlar artıq öz yerlərini tutmuşlar, daha da təkmilləşərək yaxşı yerlərdə işləyirlər. Bu gün iqtisadi-sosial baxımdan inkişaf edən şəhərimizdə bu kimi şəxslərə böyük ehtiyac var. Mən inanıram ki, bu şəxslər şəhərimizə dəvət olunsa, öz bilik və bacarıqlarını əsirgəməyəcəklər. Onu da qeyd etmək istərdim ki, dövlətimizin gənclər şəhərinə olan diqqəti çox böyükdür, biz bunları görürük və bu, bizim üçün çox sevindirici bir haldır. Məhz bu baxımdan inanıram ki, qısa zaman ərzində bu istəklərimiz yerinə yetəcək. Son zamanlar Sumqayıtda baş verən dəyişikliklər bunun yaxın zamanlarda olacağına işarə verir. Bu uğurlu və vaxtında olan dəyişikliklər: ilkin olaraq icra başçısının dəyişdirilməsi, Sumqayıtdan Parlamentə doğru, işgüzar, lazımlı şəxslərin seçilməsi bir daha şəhərimizdə iqtisadi-sosial inkişafın olacağını göstərir. Bunu tək mən demirəm, rastlaşdığım, eşitdiyim, gördüyüm insanlar da bu sözləri deyir. Sakinlərdə bir ümid yeri yaranıb.

-Qeyd etdiniz ki, bu şəxslər şəhərimizə dəvət olunsa, öz bilik və bacarıqlarını əsirgəməyəcəklər. Məsələn, biri siz, dəvət olunsanız, gələrsinizmi ?

- Öncə öz adımdan danışım, əlbəttə, gələrəm. Paytaxtda işləsəm də, şənbə, bazarımı Sumqayıt gəncləriylə keçirirəm. Son iki ayı qeyd edə bilərəm ki, şəhərin ictimai-iqtisadi inkişafına aid onlarla yeni ideyalar, 4 layihənin yazılmasında yaxından köməklik göstərmişəm. Bunları qeyd etməkdə fikrim budur ki, şəhərdən kənarda işləsək də, əvvəlki illər qədər də olmasa, öz köməkliyimizi edirik. Qaldı ki digər yoldaşlara, fikrimcə, hər bir "gənc şəhərli” olan, şəhərimizə iş üçün dəvət olunsalar, gələrlər. Qeyd etdiyim kimi, onlar işsizlikdən, diqqətsizlikdən öz şəhərindən kənarda işləməyə məcbur olmuşlar.
Ən azından iş üçün olmasa da, şəhərin inkişafı üçün bu şəxsləri toplantılar keçirərək bir araya yığaraq yeni ideyalar əldə etmək, layihələr reallaşdırmaq olar.

Bu gün Sumqayıtda yeni iş yerlərinin açılmasının sayı artırılarsa, mütləq bu kimi şəxslərə ehtiyac duyulacaqdır. Son bir neçə ayda böyük işlərin görüləcəyini yeni təyin edilən icra başçısı, seçilən millət vəkilləri mətbuatda, görüşlərdə, sosial şəbəkələrdə dəfələrlə vurğulayırlar. Şəhəri gəzərkən artıq bu işlərin qısa zaman ərzində başlandığını görürük. Hamılıqla inanırıq ki, bu işlər uğurla başa çatdırılacaqdır. Bu halda iqtisadi inkişafla yanaşı, yeni iş yerlərinin açılması, işsizliyin aradan qaldırılması ilə nəticələnəcəyinə heç bir şübhəmiz yoxdur.

-Bu gün Sumqayıtda yeni iş yerlərinin açılması ilə bağlı danışdınız. Axı deyirlər, 2016-cı il ölkəmiz üçün ağır il olacaq, böhran gözlənilir. Belə olacağı təqdirdə yeni iş yerlərinin açılması mümkündürmü ?

- Əvvəlcə onu qeyd etmək istərdim ki, ölkəmizdə qeyri-neft sektoru çox uğurlu və sürətlə inkişaf etdirilir. 2016-cı il qeyri-neft sektoru, iqtisadi inkişaf üçün daha da sürətli olacaq. Makroiqtisadi göstəriciləri və dövlət rezervlərini də nəzərə alsaq, görərik ki, ölkədə böhran üçün hər hansı səbəb yoxdur. Doğrudur, 2016-cı il Azərbaycan iqtisadiyyatı üçün asan il olmayacaq. Amma bu, Azərbaycan iqtisadiyyatında böhran olacağı anlamına gəlməməlidir.
Neftin qiyməti aşağı düşsə də, Azərbaycan iqtisadi artım tempini qoruyub saxlaya biləcək. Statistik rəqəmlərə baxdıqda görərik ki, gələn il Azərbaycan üçün proqnozlaşdırılan iqtisadi artım göstəricisi MDB ölkələri üzrə orta artım göstəricisindən 6 dəfə çoxdur. Bir sözlə, ölkəmizdə digər region ölkələrindən fərqli olaraq böhran təhlükəsi yoxdur. Sumqayıtda yeni iş yerlərinin açılmasına gəldikdə isə, hədəflər, görülən işlər, şəhərimizdə minlərlə iş yerinin açılmasına gətirib çıxaracağını görürürük. Hal-hazırda başlanan bu sürətli iş, qarşıya qoyulmuş hədəf sumqayıtlıların xeyrinə olacaq. İnanırıq ki, qısa zaman ərzində biz bunları görəcəyik. Görülən bu sağlam işdə əziyyəti keçən hər kəsə çox sağol deyir və uğurlar arzu edirəm.

-Sumqayıt 2015-ci ildə sizin yaddaşınızda necə qaldı və sumqayıtlılara nə kimi arzularınız var?

- Sumqayıtda 2015-ci il mənim üçün həm sevindirici hadisələrlə, həm də kədərli anlarla yadda qaldı. Sevindirici hadisələr budur ki, şəhərimizdə böyük dəyişikliklər oldu. İstər icra hakimiyyətində, istərsə də parlament seçkilərində. Mən inanıram ki, bu dəyişikliklər hər bir Sumqayıt sakininin xeyrinə olacaq.

Kədərli anlar da yaşadıq bu ildə. Hər-birimizin yaxından tanıdığı Gənclər və İdman Baş İdarəsinin əməkdaşı, dostmuz Rüstəm Sadıqzadə gənc yaşında rəhmətə getdi. Bu, çox çox ağır oldu bizim üçün. Çox yaxşı kadr kimi yetişmişdi öz işində dostumuz. Şəhərimiz üçün lazımi kadrlardan biri idi.
Həmşəhərlilərimə arzularım budur ki, 2016-cı ildə istək və arzuları yerinə yetsin. Abad, təmiz və səliqəli şəhərdə, həyətdə yaşamaq hər kəsin arzusudur. Əminəm ki, Sumqayıtda gedən quruculuq, abadlıq işləri tezliklə bütün məhəllələrin sakinləri üçün bayrama çevriləcək. Bir daha səbəbkarları alqışlayır, onlara bu işdə uğurlar arzu edirik. Ən böyük arzularımdan biri də budur ki, o gün olsun, şəhərin rəhbəri Sumqayıtın "beyin axını”na səslənsin ki, öz bilik və bacarıqlarınızı başqa yerdə, xaricdə deyil, öz şəhərimizdə tətbiq etmələrinin vacib olduğunu bəyan etsin. "Artıq sizin bu yerləri tutmağınızın vaxtı gəlib çatıb” kimi sözləri eşidək.
Bir daha Sumqayıt üçün çalışan hər kəsə uğurlar arzu edirəm.

Söhbətləşdi: Ruslan Orucov
Xeberle.com