Özbəkistanda oktyabrın 27-də keçiriləcək parlament seçkilərini müşahidə etmək üçün bu ölkənin Daşkənd şəhərində səfərdə olan Azərbaycan Respublikası Milli Məclisinin deputatı Səbinə Salmanova və MDB Parlamentlərarası Assambleya Şurası Baş katibinin müavini, Azərbaycan Respublikası Milli Məclisinin MDB Parlamentlərarası Assambleyasında səlahiyyətli nümayəndəsi Aydın Cəfərov Özbəkistan Konstitusiya Məhkəməsinin sədri Mirza Ulugbek Abdusalomov, Mərkəzi Seçki Komissiyasının sədri Zayniddin Nizamxodjayev və Ali Məclis Senatının sədri Tənzilə Narbayeva ilə görüşüblər.
Xeberle.com xəbər verir ki, görüşlərdə Azərbaycan ilə Özbəkistan arasında bütün sahələrdə əlaqələrin yüksək səviyyədə olduğu bildirilib, əməkdaşlığın bundan sonra da inkişaf etdiriləcəyinə əminlik ifadə olunub.
Mirza Ulugbek Abdusalomov nümayəndə heyətinə Özbəkistan Konstitusiya Məhkəməsinin parlament seçkiləri ilə bağlı ölkəsinin Konstitusiyasında və qanunlarında təsbit edilmiş səlahiyyət və funksiyaları barədə ətraflı məlumat verib. Görüş zamanı parlament seçkiləri ilə bağlı hüquqi məsələlər ətrafında fikir mübadiləsi aparılıb.
Zayniddin Nizamxodjayev oktyabrın 27-də keçiriləcək parlament seçkisinin azad, ədalətli və şəffaf keçirilməsi istiqamətində atılmış addımlar və reallaşdırılmış genişmiqyaslı layihələrdən danışıb.
Özbəkistan Ali Məclisi Senatının sədri Tənzilə Narbayeva isə ölkələrimizin arasındakı əlaqələrin inkişafında iki ölkənin parlamentlərinin xüsusi önəminin olduğunu bildirib.
Azərbaycan nümayəndə heyəti seçkilərin müşahidəsində iştirakdan məmnun olduğunu qeyd edərək prosesləri fəal şəkildə izləyəcəklərini vurğulayıblar. Onlar seçkilərin uğurla keçiriləcəyindən əmin olduqlarını vurğulayıblar.
Azərbaycan nümayəndə heyəti görüşlərdə aktivlik nümayiş etdirərək onları maraqlandıran məsələlərlə bağlı qarşı tərəfə suallar ünvanlayıblar. Özbəkistan rəsmiləri Azərbaycan nümayəndə heyətinin suallarını cavablandırıblar.
Görüşlərdə həmçinin qarşılıqlı maraq doğuran digər mövzular haqqında da fikir mübadiləsi aparılıb.
Xəbərdən istifadə edərkən istinad etmək vacibdir.
