Artıq DYP əməkdaşları avtomobildə gizlədilmiş radarlarla xidmət aparır. Belə ki,10-YP-777 nömrəli “Niva” markalı maşında DYP əməkdaşı gizli radar yerləşdirib. Ona bunun qanuni olub-olmaması ilə bağlı sual verilsə də polis əməkdaşı yalnız susmaqla kifayətlənib.

Eyni zamanda Bakı-Sumqayıt yolunun Ceyranbatan qəsəbəsindən keçən hissəsində10–YP-990 dövlət nömrə nişanlı “BMV” markalı avtomobilin içərisində də radar qurulub. Yol patrul xidməti əməkdaşı Nizami Salamov qanuni xidmət apardığını deyir. Hətta ona yaxınlaşan vətəndaşı mane olmaması ilə bağlı xəbərdar da edir.

- Burda niyə durmusuz?
- Hərəkət surətinə nəzarət edirik.
- Radar var qabaqda.
- Xeyr. Burda gizli xidmət gedir də.
- Qanunda elə şey var?
- Bəli var.
- Hansı qanunda?
- Yol hərəkəti haqqında qanunda.
- Neçənci maddə?
- Zəhmət olmasa, yaxınlaşın Respublika "QAİ"sindən məlumat alın. Mən burda xidmətdəyəm. Mənə mane olmayın.
- Neçənci maddə?
- Xahiş edirəm, mənə mane olma. Mən burda xidmətdəyəm.

Məsələyə Baş Dövlət yol polisi idarəsinin şöbə rəisi Kamran Əliyev aydınlıq gətirərək deyib ki, onların fəaliyyəti qanun çərçivəsindədir və yollarda sürət həddini aşan sürücülərin müəyyənləşdirilməsinə xidmət edir: “Sürücülərin sürət həddini aşmaması hallarının qarşısını almaq üçün radarlardan istifadə edilir. Yol patrul xidməti haqqında təlimata əsasən yol təhlükəsizliyinə nəzarət 3 formada həyata keçirilir. Aşkar, gizli və qarışıq formada. Həmin nişanlardan ən azı biri yaşayış məntəqəsində 50-200, yaşayış məntəqəsindən kənarda isə 150 metrdən 1000 metrə qədər məsafədə olması vacibdir”.

ANSPRESS