44 günlük Vətən müharibəsində qazanılan Zəfər Azərbaycan tarixinin ən şanlı, ən parlaq səhifəsidir. Şəhidlərimizin qanı-canı, qazilərimizin itirilmiş sağlamlıqları bahasına, ümumilikdə Azərbaycan hərbçilərinin, Azərbaycan döyüşçülərinin şücaəti, igidliyi, rəşadəti hesabına tariximizin dastanlara sığmayan qəhrəmanlıqlarla dolu bu əbədiyaşar səhifəsinin yazılmasında qazi Kamran Baxşizadənin də öz payı var. Bu pay - 30 ilə yaxın düşmən tapdağı altında qalan Qarabağın azad olunması uğrunda verdiyi göz payıdır.

1994-cü il oktyabrın 14-də Xızıda anadan olmuş Baxşizadə Kamran Tarel oğlu ilk təhsilini şəhid Rafiq İsmayılov adına Xızı şəhər orta məktəbində alıb. 2012-ci ildə Naxçıvan Universitetinə daxil olan Kamran 2016-cı ildə həmin təhsil ocağını tarix müəllimi ixtisası üzrə bitirib. 2016-17-ci illərdə Naxçıvanda hərbi xidmətdə olub. 2017-ci ildən II Qarabağ müharibəsi başlayana qədər Xızı Rayon Məhkəməsində dəftərxana müdiri vəzifəsində çalışıb. 2020-ci il sentyabrın 27-də könüllü olaraq Vətən müharibəsinə gedib. Erməni işğalçılarını torpaqlarımızdan qovmaq, onlardan qisas almaq amalı ilə, ürəyində Vətən sevgisi, Vətən eşqi ilə müharibəyə yollanan Kamran Baxşizadə xüsusi təyinatlı dəstələrin tərkibində döyüşlərə qatılıb. Ağdərə -Tərtər istiqamətində gedən qanlı savaşlarda iştirak edib.

Oktyabrın 14-də Suqovuşanda torpaqlarımızın işğaldan azad olunması zamanı növbəti hərbi əməliyyatlarda iştirak edən Kamran kəşfiyyat tapşırıqlarını yerinə yetirərkən, düşmən mərmisinə tuş gələrək ağır yaralanıb, gözlərini itirib.

Bəli, 1994-cü il oktyabrın 14-də dünyaya göz açan Kamran Baxşizadə 26 il sonra öz doğum günündə həmin gözləri itirdi...

Lakin gözlərinin nurunu itirən qazi Kamran Baxşizadənin çöhrəsində səmimiyyət, mehribanlıq, alicənablıq, qürurluluq, vüqarlılıq, mətinlik, həyat şövqü itməyib. Vücudunda, hər addımında məğrurluq var, hər kəlməsində "Vətən” var, "Millət” var, "Torpaq” var onun!

"Xızı” qəzetinə verdiyi müsahibədə həmsöhbətim Kamran Baxşizadə bildirdi: "Oktyabrın 14-ü həm doğum günümdür, həm də candan əziz Vətənimin azadlığa qovuşması uğrunda gözlərimi itirdiyim gündür. Bu tarix mənim üçün əlamətdar və qürurvericidir. Millətim, dövlətim, torpağım naminə işğalçıları məhv edərək gözlərimi itirdiyim gün mənim üçün fəxarət günüdür. Mən şəhid olmasam da, gözlərim şəhid oldu.”

Ağır yaralanaraq gözlərini itirdiyi günü səbrlə, təmkinlə, fəxrlə xatırlayan Kamran Baxşizadə möcüzə şəklində yenidən həyata qayıtmasını döyüş dostlarının və həkimlərin fədakarlığı nəticəsində baş verdiyini söylədi.

Kamran Tarel oğlu Baxşizadə Azərbaycan Prezidenti cənab İlham Əliyevin 18 dekabr 2020-ci il tarixli Sərəncamı ilə "Cəsur döyüşçü”, 29 dekabr 2020-ci il tarixli Sərəncamı ilə "Suqovuşanın azad olunmasına görə” medalları və Azərbaycan Respublikası Nazirlər Kabinetinin 21 aprel 2022-ci il tarixli Sərəncamı ilə "Vətən müharibəsi iştirakçısı” medalı ilə təltif olunub.

Bildiyimiz kimi, respublikamızda həyata keçirilən sosial siyasətin əsas prioritetlərindən biri də müharibə əlilləri, şəhid ailələri və qazilərə göstərilən dövlət qayğısıdır. Müzəffər Ali Baş Komandan Prezident İlham Əliyev dövlət qurumları qarşısında bu həssas təbəqəyə aid olan insanların problemlərinin həllini mühüm vəzifə kimi müəyyən edib. Elə bu səpkidə apardığımız söhbət zamanı qazi Kamran Baxşizadə dedi: "Prezident İlham Əliyev başda olmaqla, müvafiq dövlət qurumları tərəfindən daim diqqət və qayğı ilə əhatə olunmuşam. Mənə Sumqayıt şəhərində 3 otaqlı mənzil və "Xazar” markalı minik avtomobili verilib. Xızıda valideynlərimlə birgə yaşadığım fərdi ev Ədliyyə Nazirliyi tərəfindən yüksək keyfiyyətlə tam təmir olunub. Həyət və küçə asfaltlanıb. Bayramlarda və əlamətdar günlərdə sovqat və yardımlar göndərilir. Ailə üzvlərimin işlə təmin olunmasında köməklik göstərilib. Bunu da müsbət qiymətləndirirəm. Belə ki, DOST Mərkəzi tərəfindən bacım işlə təmin olunaraq mənə qulluq edir, xidmət göstərir. Qardaşım Şükür Baxşizadə Xızı Rayon Məhkəməsində mənim əvvəllər icra etdiyim vəzifəyə təyin olunub. O, hal-hazırda hərbi xidmətdədir. Onu da qeyd edim ki, Xızı Rayon İcra Hakimiyyəti, Azərbaycan Respublikası Ədliyyə Nazirliyi, "YAŞAT” Fondu, "Azərbaycan Gözdən Əlillər Cəmiyyəti” İctimai Birliyi öz diqqət və qayğılarını heç zaman əsirgəmirlər.”

Qazimizin atası Tarel Baxşizadə öz vətənpərvər oğlu ilə fəxr etdiyini qürur hissi ilə vurğulayaq, dövlət tərəfindən göstərilən diqqət və qayğıdan razılığını bildirdi.

"Qarabağ Azərbaycandır!” deyərək Vətənimizin azadlığı naminə canlarını əsirgəməyən minlərlə şəhidimiz, qazilərimiz var. Allahdan şəhidlərimizə rəhmət, qazilərimizə şəfa diləyirik!

Rafael Məmmədov,

"Xızı” qəzetinin baş redaktoru