Cavid Azər oğlu Mirzəyev 13 noyabr 1994-cü il tarixdə Siyəsən rayonunun Gilçay qəsəbəsində anadan olub. Sumqayıt şəhər 40 və 1 saylı tam orta məktəblərdə təhsil alıb. Bakı Slavyan Universitetində ali təhsil aldıqdan sonra, həqiqi hərbi xidmətdə olub. Hərbçi olmaq, Vətənin müdafiəsində durmaq, torpaqlarımızı yağı düşməndən azad etmək arzusunda olan C.Mirzəyev, Müdafiə Nazirliyinə müraciət edir və razılıq alır. O, ASQ-nin "Təlim və Tədris Mərkəzi”ndə "Zabit hazırlığı” kursunu bitirir və "leytenant” rütbəsi ilə hərbidə xidmətə başlayır.

44 günlük Vətən müharibəsində şücaəti ilə adını Zəfər tarixinin şanlı səhifələrinə yazan igid oğullardan biri də Baş leytenant Cavid Mirzəyev olur. Göstərdiyi şücaətə görə, o, Azərbaycan Respublikasının prezidenti İlham Əliyevin müvafiq Sərəncamlarına əsasən, ”Vətən müharibəsi iştirakçısı”, ”Hərbi xidmətdə fərqlənməyə görə” 3-cü dərəcəli medallarla, həmçinin "Füzulinin azad olunmasına görə”, "Xocavəndin azad olunmasına görə” medalları ilə təltif olunub. 2023-cü ilin sentyabr ayında baş verən lokal antiterror əməliyyatı zamanı Vətən sevdalı zabit həlak olaraq Şəhidlik Zirvəsinə ucalır.

...Ata olacağı xəbərini eşidəndə sevincinin həddi-hüdudu olmur. Nələr yaşadı, hansı hisslər keçdi qəlbindən, təsəvvür etmək çətin deyil...

Şərəfli olduğu qədər də, məsululiyyətli hərbçi həyatını seçəndə o, hər şeyi gözə almışdı. Əməlləri ilə hər zaman valideynlərinin başını uca etməyə çalışmışdı. Hər zaman xoş arzularla yaşayan Cavid Səbinə xanımla ailə hayatı qurandan sonra arzuları daha da tükənməz olmuşdu... Ən böyük arzularından biri də, dünyaya gələcək övladının adını "Cavidan” qoymaq idi. O, hər zaman deyərdi: "Hiss edirəm ki, canımda Babəkin ruhu dolaşır. Gərək adımı "Cavidan” qoyaydız...”.

40 gün nə tez gəlib keçdi... Hər kəs Mirzəyevlər ailəsinə tələsirdi, Şəhidinin yadigarını görməyə... Yaşma ərazisində yerləşən həyət evi insan axını ilə dolub-boşalırdı. Gələnlər arasında Şəhid ailələri, Cavidin təhsil aldığı orta məktəblərin pedaqoji kollektivi, məktəb yoldaşları, dostları... var idi. Balaca körpə isə, dünyadan bixəbər halda, atasının "ev muzeyi” olan otağında, məsum baxışları ilə gah ətrafa boylanır, gah aclıq hissindən ağlayaraq başını sağa-sola döndərməklə yeməyini axtarır, gah da nəzərləri atasının şəkili üzərində donub qalırdı. Sonuncu mənzərə hər kəsi təəccübləndirirdi. Sanki körpə atası ilə gizlicə təmasda idi...

Bəli, dünyanın gərdişindən xəbərsiz olan bu, kiçik varlıq böyüdükdə, hər şeyi anlayıb dərk etdikdə, atasının şücaətlərindən xəbərdar olduqda Qəhrəman ATA ilə qürur duyacaq! Atasızlıq onu nə qədər üzsə də, Allahın ən sevimli, seçilmiş bəndəsi kimi, məkanının Cənnətdə olması ilə rahatlıq tapacaq... Və Vətən sevdalı Şəhidinin şərəfli yolunu davam etdirərək ona layiq olmağa çalışacaq. Biz buna əminik!

Ruhun şad olsun, Şəhidim, bizlərə əmanət olan övladın etibarlı əlllərdədir! Onu göz bəbəyi kimi qorumaq bizlərin borcudur!

Cavidan Paşamıza Uca Allahdan sağlam, mənalı, dəyərli, sevinc dolu bir ömür, həyat yolunda bol uğurlar diləyərək. Şəhidimizin əziz-doğmalarına bir daha deyirik : "Gözünüz aydın olsun!”.

P.S.: Bir də, arzu edərdik ki, Şəhid ailələrinə diqqət və qayğısını əsirgəməyən Ölkə Rəhbəri, Ali Baş Komandan cənab İlham Əliyevin bütün Şəhid ailələrinin mənzillə təmin edilməsi ilə bağlı Sərəncamına əsasən, Mirzəyevlər ailəsinə də tezliklə mənzil verilsin. Unutmayaq ki, o mənzildə SABAHIN ƏSGƏRİ böyüyəcək!

Şəhərdən xeyli uzaq məsafədə yerləşən, yetərincə problemləri olan bağlar massivindən hər gün Şəhidlər Xiyabanına dəyməyin, müəyyən məsələlərlə bağlı, gün ərzində lazım olduqda bir neçə dəfə şəhərə gedib-gəlmək məcburiyyətində qalan yaşlı insanlar üçün nə qədər çətin olduğunu düşünsək,.. İnanırıq, ki, yaxın gələcəkdə Qəhrəmanımızı yeni mənzildə ziyarət edə biləcəyik. Təki istək, təki əməl olsun...

Aygün Hacıyeva,

AJB, AYB və AAB-nin üzvü