Xeberle.com xəbər verir ki, tədbir Azərbaycanın Dövlət Himninin səsləndirilməsi və şəhidlərin xatirəsinin bir dəqiqəlik sükütla yad edilməsi ilə başlayıb.

Qonaqları salamlayan QAİ Sumqayıt nümayəndəliyinin sədri Ramiz İsmayılov bir il ərzində görülən işlər, həyata keçirilən layihələr barəsində geniş məlumat verib.

R. İsmayılov icma üzvlərinin fəallığı ilə yanaşı, dövlətimizin, o cümlədən Sumqayıt Şəhər İcra Hakimiyyətinin Başçısı Zakir Fərəcovun diqqət və qayğısını ötən müddət ərzində hiss etdiklərini vurğulayıb.

Bildirilib ki, nümayəndəliklə yerli icra orqanları arasında əlaqəli işlər qurulub. Nümayəndəlik üçün 4 otaqdan və 1 konfrans zalından ibarət tam şəraitli ofis verilib.

"Göstərilən diqqətin özü dövlətimizin Qərbi Azərbaycan mövzusuna nə qədər həssas yanaşdığını göstərən amildir. Nümayəndəlik olaraq biz də göstərilən etimadı dərk edərək, bir il ərzində müxtəlif səpkili işlər görə bildik. Görülən işlər arasında əsasən milli-mədəni birliyə nail olmaq, müxtəlif tədbirlər, habelə intellektual oyunlar keçirməklə yanaşı,ölkə və dünya mediasında İcmanın fəaliyyətinə dair müxtəlif səpkili materialların paylaşılması əsas hədəflərdən olub", - deyə R.İsmayılov qeyd edib.

Hesabat dinlənildikdən sonra QAİ Sumqayıt şəhər nümayəndəliyinin fəaliyyətini əks etdirən video-təqdimat nümayiş etdirilib.

Sonra QAİ İdarə Heyətinin sədri, Milli Məclisin deputatı Əziz Ələkbərli çıxış edərək Sumqayıt şəhər nümayəndəliyinin fəaliyyətinin digər nümayəndəliklərə nümunə olduğunu diqqətə çatdırıb.

Ə.Ələkbərli həm icma üzvlərinə, həm də tədbirdə iştirak edən Sumqayıt şəhər rəhbərliyinə təşəkkür edib və bildirib ki, İcmanın Qayıdış Konsepsiyasının prinsiplərindən irəli gələn öhdəliklər bütün resurslardan istifadə edilərək yerinə yetirilir.

QAİ sədri vurğulayıb ki, İcmanın ən böyük uğuru Qərbi Azərbaycan məsələsinin ümummilli məsələyə çevrilməsidir. O, İcmanın beynəlxalq müstəvidə əldə etdiyi nailiyyətlərdən də bəhs edib.

Sumqayıt Şəhər İcra Hakimiyyəti Başçısının birinci müavini Teymur Səmədov Ə.Ələkbərli başda olmaqla toplantı iştirakçılarına İcra başçısı Zakir Fərəcovun salamlarını çatdırıb. O, QAİ-nin Sumqayıt nümayəndəliyinin fəaliyyəti barədə danışaraq əlavə edib ki, Sumqayıt nümayəndəliyinin ofisi təkcə Qərbi Azərbaycanlıların deyil, həmçinin özünü Qərbi azərbaycanlı sayan hər bir vətəndaşın ofisidir.

Sonra Milli Məclisin deputatı Müşfiq Məmmədli çıxış edərək bildirib ki, Qərbi Azərbaycan ideyası milli ideya olduğundan hamı bu ideyaya sadiq olub, bu işə köməklik göstərməlidir.

Sonda Sumqayıt şəhər nümayəndəliyinin fəaliyyətində fəallıq göstərən, xüsusi xidmətləri ilə seçilən icma üzvləri Təşəkkürnamə ilə təltif olunublar.