Bu dəfəki qonağımız cazibədar aparıcı Vüsalə Şahvəliqızıdır. V. Şahvəliqızı Xeberle.com-un suallarını cavablandırıb.

- Müsahibələrinizin birində söyləmisiniz ki, ən böyük arzunuz aparıcı olmaq olub. Inanırdınız ki, bu arzunuz reallaşacaq?

- Aparıcı olmaq mənim uşaqlıq arzum olub. Bu arzumun reallaşacağına çox inanırdım. Belə də oldu.

- Aparıcı kimi fəaliyyətə başladığınız ANS TV oldu. Bu kanalda calışmaq çətin deyildi ki?

- ANS TV-də işləmək çox çətin idi. Amma buna baxmayaraq xoş idi. İş rejimi ağır olsa da bütün verilən tapşırıqların öhdəsindən sevə-sevə gəlirdim. Bu kanaldan mən çox şey öyrəndim.

- Sənət seçimi ilə bağlı ailədə narazılıqlar oldu?

-Əvvəllər ailədə bu sənəti seçdiyim üçün narazılıqlar oldu. Amma zaman keçdikcə mənim seçimimlə razılaşdılar. Çünki onlar bilirdilər ki, mənim bu sənətə hədsiz sevgim var.

- Sizi ANS TV-dən sonra Space TV –də gördük. Kanaldan ayrılmağınıza səbəb nə idi?

- Mən ANS TV-dən öz istəyimlə ayrılmışam. Ayrılmağımın səbəbi isə iş rejiminin çox ağır olması ilə əlaqədardır.

- Özünüzə qapanan xanıma bənzəyirsiniz. İçinizdəki "mən"lə tək qaldığınız anlar çoxmu olur?

- Bəli olanda olur. Özümə qapanıram.

- Özünüzü xoşbəxt insan hiss edirsiniz?

- Özümü kənardan göründüyü kimi xoşbəxt hiss etmirəm.

- Nədə görürsünüz xoşbəxtliyi?

- Təbii ki,övladlarımın xöşbəxtliyində və karyeramın yüksəlişində görürəm.

- Hazırda Space radiosunda Səhər proqramını aparırsınız. Televiziya yoxsa radio, hansı sizə daha yaxındır?

- Aparıcılığa televiziya ilə başlasam da az bir müddətdə radio məni özünə çox bağladı. Hər gün tezdən dinləyiciləri salamlamaq artıq mənim missiyama çevrilib.

- Ümumiyyətlə aparıcı üçün ən böyük məktəb televiziya, yoxsa radiodur?

- Hər ikisi ayrı-ayrılıqda məktəbdir. Ancaq radio ilk məktəbdir. İstər müasir televiziya, istərsə də digər yayım vasitələri ilkin radiodan qaynaqlanır.

- Hazırda "Bacanaqlar"serialında Natavan obrazını oynayırsınız. Necə düşünürsünüz bu obraz Nataşanı tamaşaçılara unutduracaq?

- Natavan obrazı Nataşa obrazını unutdura bilər, ancaq bir müddətlik. Natavan obrazı qısamüddətli obrazdır. O bu yaxınlard tamamlanacaq O, sadəcə onun üçündür ki, Abbas bilsin ki, kim həqiqətən onu sevir. Təbii ki,onu Nataşa həqiqətən sevir. Hər halda tamaşaçılar deyə bilər unutdura bilər yoxsa yox.

- Natavan obrazı ilə Vüsalə arasında oxşarlıq var?

- Tam əks insanlardır.Heç bir oxşarlıq yoxdur. Natavan hara, Vusalə hara?

- Space TV-də "Gözəlliyin sirri"verilişini aparırsınız. Gözəlliyin sirrini nədə görürsünüz?

- Daxili gözəllik anadangəlmə yaranır. Anadangəlmə olmasa da biz onu beynimizdə formalaşdıra bilərik. Amma xarici gözəllik elədir ki, bu yaranışdan olmaya da bilər. Amma yaradan insanlar da var. Vizajistlərimiz, həkimlərimiz var. Məncə daxili gözəlliklə xarici gözəllik bir-birini tamamlayanda bu mükəmməl bir obraz olur.Əsl gözəlliyin sirri də elə bundadır. Mən çalışdığım qədər məni izləyən xanımlara gözəlliyin düzgün tərəflərini anlatmaq istəyirəm ki, əslində necə eləsələr daha gözəl görsənəcəklər.

- Vüsalə xanım, bu veriliş sizin obrazınıza tam uyğundur,yoxsa fikrinizdə elə bir veriliş var ki,onu həyata keçirmək istərdiniz?

- Mən istənilən verilişi özümə uyğunlaşdırıb,özümünküləşdirib aparıram. Eləcə də "Gözəlliyin sirri"verilişini öz tərzimdə aparmağa çalışmışam. Sadəcə olaraq mənim bir istəyim var ki, mən gün ərzində Xəbərlər proqramını aparmaq istərdim. Bu çətin bir məsələ olardı. Amma bir-iki ay üzərimdə çalışsaydım öhdəsindən gələrdim. Ürəyimcə olardı. Amma "Gözəlliyin sirri"verilişi də mənim çox ürəyimcədir.

- Növbəti sualı sizi bir qədər keçmişə apara bilər. Bildiyimə görə, Sumqayıt şəhərində doğulmusunuz, həyatınızın 18 ilini bu şəhərdə yaşamısınız. Bu illər ərzində şəhər həyatınızda daha çox xoş hadisələrlə yadda qalıb yoxsa əksinə?

- Bəli,doğulduğum şəhəri çox sevirəm. Hətta deyərdim lap çox. Əlbəttə ki,voleybol, futbol, gizlənqaç oynadığım anları necə unuda bilərəm axı?! Sumqayıtda çox xoş anlarım olub.

- Sumqayıtdakı dostlarınıza tez-tez baş cəkirsiniz?

- Düzünü desəm heç birindən xəbərim yoxdur. Onlarla əlaqəm illər öncə bitib.

- Sumqayıta gəldiyiniz zaman hansı hisslər keçirirsiniz?

- Çox doğma hisslər keçirirəm, uşaqlıq illərim gözümün önündən keçir.

Zeynəb Abdullah

Xeberle.com