"İctimai iştirakçılıq haqqında” Azərbaycan Respublikasının 2013-cü il 22 noyabr tarixli 816-IVQ nömrəli Qanununa, Qanunun tətbiqi barədə Azərbaycan Respublikası Prezidentinin 2014-cü il 16 yanvar tarixli 89 nömrəli Fərmanına və Azərbaycan Respublikası Nazirlər Kabinetinin 2014-cü il 30 may tarixli 171 nömrəli Qərarı ilə təsdiq edilmiş "İctimai şuranın vətəndaş cəmiyyəti institutları tərəfindən seçilməsinə dair Əsasnamə”yə uyğun olaraq İqtisadi Zonaların İnkişafı Agentliyinin nəzdində Peşə Təhsil Mərkəzi yanında yeni yaradılmış İctimai Şuranın üzvləri ilə görüşü keçirilib.
Görüş zamanı Peşə Təhsil Mərkəzinin direktoru Kənan Bağırov seçilmiş üzvləri təbrik edib və onlara gələcək fəaliyyətlərində uğurlar arzulayıb. O, İctimai Şuranın üzvlərindən gözləntilərin yüksək olduğunu vurğulayıb və İctimai Şuranın fəaliyyətinin əhəmiyyətini qeyd edib. Kənan Bağırov həmçinin Peşə Təhsil Mərkəzinin ümumi fəaliyyəti, həyata keçirilən proqramlar və əməkdaşlıqlar barədə Şura üzvlərini məlumatlandırıb.
Daha sonra İctimai Şuranın açıq səsvermə yolu ilə rəhbər vəzifələrinə seçki keçirilib. "Ümüdli Gələcək Sosial Təşəbbüslər" İctimai Birliyinin icraçı direktoru Kəmalə Aşumova İctimai Şuranın sədri, "Müstəqil Həyat Tərzi" Əlillərə Dəstək İctimai Birliyinin sədri Aydın Xəlilov İctimai Şuranın sədr müavini və "Azərbaycan Uşaqlarının İnkişaf Platforması" İctimai Birliyinin sədr müavini Əsmər İsmayılova İctimai Şuranın katibi seçiliblər.
Görüş zamanı İctimai Şura üzvləri tərəfindən gələcək fəaliyyətləri barədə fikir mübadiləsi aparılıb və müvafiq təkliflər verilib.
Xəbərdən istifadə edərkən istinad etmək vacibdir.
