Son vaxtlar Sumqayıt şəhərinin nəqliyyatı sahəsində bir sıra işlər görülsə də, bununla yanaşı hələ də şəhər sakinləri bəzi marşrutların fəaliyyətindən razı deyillər və bu tip şikayətlərdən biri də 4 nömrəli avtobuslarla bağlıdır.
Sumqayıt şəhərində Aliminium zavod-Corat qəsəbəsi marşrutu üzrə hərəkət edən 4 nömrəli avtobusun fəaliyyəti sərnişinlərin heç də ürəyincə deyil.
Corat sakinləri Xeberle.com-a yenidən müraciət edərək bildirir ki, Sumqayıtdan Corata işləyən "50-AE-746” dövlət nömrəli nişanlı tək 4 nömrəli avtobusdur. İntervalı da 1 saat 30 dəqiqə təşkil edir. Avtobusu saat 22:30-adək işləyir. Sakinlər bildirir ki, sözügedən maşrut xəttinin iş qrafikində pərakəndəlik, özbaşınalıq hökm sürür.
Tez-tez 4 nömrəli avtobusla bağlı çoxsaylı şikayətlərlə bağlı yazı dərc etmişik. Problemlərin ilbəil aradan qaldırılacağına ümid etsək də, təəssüf ki, problemlər yerində sayır.
Ötən yazımızda sualımızı Azərbaycan Yerüstü Nəqliyyat Agentliyinə (AYNA) ünavanlamışdıq. Qurumun mətbuat katibi Tural Orucov Xeberle.com-un sorğusuna cavab olaraq bildirmişdi ki, 4 nömrəli maşrutun nizamlı fəaliyyətinin təmin edilməsi barədə tapşırıq verilib: "Sumqayıt şəhərinin Alüminium zavodunu Corat qəsəbəsi ilə əlaqələndirən 4 nömrəli marşrut xəttində gün ərzində 4 avtobus 18-20 dəqiqəlik intervalla sərnişinlərə xidmət göstərir. Daşıyıcıya xətt üzrə avtobus sayının artırılması və marşrutun nizamlı fəaliyyətinin təmin edilməsi barədə tapşırıq verilib”.
Cavab ürəkaçan olsa da, sakinlərin çoxsaylı şikayətləri və mənzərə tam əksini edir. Deyirlər ümid sonda ölür. Biz hər yazımızda olduğu kimi bu dəfə də problemlərin köklü şəkildə həll olunacağına yenidən ümid edirik...
Elşən Yəhyayev
Xəbərdən istifadə edərkən istinad etmək vacibdir.
