44 günlük Vətən müharibəsi şəhidi Adil Rzayevin Cənnətdəki mövludu, əziz-doğmalarının, şəhid ailələrinin və media nümayəndələrinin iştirakı ilə, uyuduğu Sumqayıt Şəhidlər Xiyabanında qeyd olundu. Qəhrəman Vətən oğlu ilə bağlı xatirələr yada düşdü, döyüş yolu vərəqləndi, xatirə olaraq şəkillər çəkildi...
Şəhidimizin anası Məhbubə xanım, qardaşı Rəşad Rzayev, Adili anıb gəldiyinə görə, hər kəsə təşəkkürlərini bildirdilər.
Anım günündə Qobustan Rayon İcra Aparatında "Vətən müharibəsi iştirakçıları və Şəhid ailələri ilə işin təşkili şöbəsi”nin müdiri Rövşən Dəmirov, Qobustan rayon İcra Hakimiyyəti Başçısının Xilmilli kəndi üzrə Ərazi nümayəndəsi Adil Bayramov və digər yoldaşlar iştirak edirdilər. Daha sonra qonaqlar və şəhid ailələri Rzayevlər ailəsinə verilən yeni mənzildə oldular, Şəhidin ev muzeyi ilə tanış olduqdan sonra, çay süfrəsi arxasında igid Vətən oğlunun keçdiyi döyüş yolu bir daha xatırlandı, ailənin problemləri ilə maraqlanıldı.
Geniş qəlbin, xoş arzuların, xeyirxah əməllərin sahibi olan Adil Rzayev sabaha böyük ümidlərlə baxar, bir gün ailəsinin ağır durumdan çıxacağına inanardı. Lakin onu ailə vəziyyətindən əvvəl Vətən torpaqlarının düşmən əsarətində olması narahat edərdi. O, hər qarış torpaq uğrunda savaşa, Şəhid olmağa hazır idi... Və elə bu amal, məqsəd uğrunda mübarizəyə qoşuldu və ZƏFƏR TARİXİnə imza atanlardan biri oldu!
Şəhidimizin həyat və döyüş yolu ulə tanış olaq.
***
Qısa ARAYIŞ:
ADİL AKİF oğluRZAYEV 20.08.1999-cu il tarixdə Qobustan rayonunun Xilmilli kəndində anadan olub. Ailənin 5-ci, sonbeşik ovladı olan Adil 2005-ci ildə Xilmilli kənd tam orta məktəbin 1-ci sinfinə qədəm qoyub. 2008-ci ildə Rzayevlər ailəsi Qobustandan Sumqayıt şəhərinə - H.Z.Tağıyev qəsəbəsinə köçüb. Adil sonradan təhsilini elə bu ərazidə yerləşən Füzuli rayon 40 saylı tam orta məktəbdə davam etdirib.
A.Rzayev 2017-cu ildə doqquzillik təhsili başa vurduqdan sonra, SHXÇDX tərəfindən müddətli həqiqi hərbi xidmətə çağrılıb. O, 2017-ci ilin oktyabr ayından 2019-cu ilin yanvar ayına kimi, Goranboy rayonunun Ballıqaya kəndində yerləşən "N” saylı hərbi hissədə xidməti vəzifəsini ləyaqətlə yerinə yetirdiksən sonra evə dönüb.
Xidməti dövründə verilən tapşırıqları doğru-düzgün, dəqiq, vaxtında və cəld yerinə yetirərək komandanlığın hormətini qazanan Adil Rzayev, təlim-tərbiyəsi, sakit davranışı, sözünün və hərəkətinin yerini bilməsi, yeri gələndə incə yumor hissinə malik olması ilə seçilib və rəhbərlik, yoldaşları tərəfindən sevilib.
A.Rzayev 2019-cu ilin yanvar ayında xidməti vəzifəsini ləyaqətlə yerinə yetirdiksən sonra evə dönür.
Ailə: Qobustandan Sumqayıta gələrək, bu şəhərdə özlərinə məskən salan Rzayevlər ailəsi 7 nəfərdən; ata, ana, 3 qardaş və 2 bacıdan ibarət olub. Ata işləyərək, Məhbubə xanım isə uşaqların tərbiyəsi ilə məşğul olaraq, ailə qayğıları ilə yaşayıblar.Böyük bir külfəti saxlamaq valideynlər üçün çox ağır olub. Çətinliklərə baxmayaraq, ata və ana valideyn öhədliklərini ləyaqətlə yerinə yetiriblər. Onlar, ən əsası, cəmiyyətə sağlam, yararlı, vicdanlı, vətənpərvər övladlar yetişdirməyə nail olublar. Məhz belə bir ailədə doğulub böyümüş və öz ailəsi ilə hər zaman qürur duyub fəxr etmişdi İgidimiz.
Adil xoş xasiyyətli, mehriban, zarafatcıl biri idi. Hər kəsə qarşı diqqətcil və mehriban olub, sadəliyi və səmimiliyi ilə seçilib. Elə bu səbəbdən hamı onu sevib və hörmət bəsləyib.
Uşaqlıqdan haqsızlıqla barışmayıb. Düzgünlük, haqq-ədalət harada olubsa Adil də orada olub. Yalan, qeybət, məkrli oyunlar, fırıldaq... – bunlar Aildən çox-çox uzaq idi. Sakit, rahat, təmiz bir həyat yaşamaq arzusunda olub hər zaman. O qədər ürəyi təmiz olub ki, ona ağız açan hər kəsə həmin an əl tutmağa, yardım etməyə çalışıb.
Adilin gözəl xasiyyətinə, ciddi xarakterinə, özünəməxsus keyfiyyətlərinə görə, əhatə dairəsi geniş idi. Çoxlu dostları vardı. Dostluqda onun üçün ən önəmli olan sədaqət, etibar və düzlük idi. Dostuna görə ölümə də gedərdi.
Qəhrəmanımızın bir az da davakarlığı vardı. O da yenə də haqsızlıqla bağlı olardı. Əzizi olsa belə, səhvdirsə, bağışlamaz, düzün tərəfində olardı. Elə doğruculluğuna görə, bəzən "razborka”lara da gedərdi. Kim xoşuna gəlməyən söz, artıq-əskik, yersiz, düşünülməmiş ifadələr işlədərdisə, onda... "Bir ömürdür, təmiz yaşa, dilinə də yiyəlik elə” deyərdi. Özü də sözübütöv idi.
Adilin uşaqlıqdan bir çox idman növləri ilə məşğul olsa da, ən çox maraq göstərdiyi "Sambo” olub. O üzdən, məşqlərə vaxtı-vaxtında gedib, məşqçinin tövsiyələrini dinləyər və tapşırıqlarını həvəslə yerinə yetirib. Hətta bir çox uğurlara da imza atıb, mükafatlandırılıb.
Adil torpağa bağlı olub. Həyət-baca işlərini çox sevdiyindən, ağaclara qulluq etməkdən zövq alıb. Hələ özü nə qədər meyvə ağacları əkib...
Adilin qardaşı Rəşad göyərçinləri çox sevib. Və bu səbəbdən çoxlu göyərçin saxlayıb. Sonradan Adil də göyərçinlərə bağlanıb və özünə göyərçinlər alıb. Adili nə zaman axtarıblarsa, onu göyərçinlərin yanında tapıblar...
09.07.2019-cu il tarixdə ailənin başçısı Akif Rzayev dünyadan köçəndə, onun itkisi hamını sarsıdır, eləcə də evin kiçik oğlunu. Həyat yoldaşını itirən Məhbubə xanım ailənin dolanışığı üçün bir çox əziyyətlərə qatlanmalı olub, işləyib, çalışıb.
Əsgərlikdən dönən Adil bir neçə ay işsiz qalr. Bu müddətdə o, ailə qayğıları yaşayaraq həyət-bacada təsərrüfatla məşğul olur, arada bir neçə günlük fərdi işlərdə çalışır. O, Sambo idman növü ilə yenidən məşğul olmağa başlayır. 2020-ci ilin yanvar ayında "Gənclər gününə həsr olunmuş sambo üzrə şəhər çempionatında 3-cü yeri tutur və Fəxri Fərmanla təltif olunur.
A.Rzayev 2020-ci ilin iyun ayında "Avrora MMC” şirkətində işə düzələrək, "Sürücü köməkçisi” vəzifəsində çalışır. Adil işləyib, halal pulu ilə maşın almaq arzusu ilə yaşayır...
Döyüş yolu:2020-ci ilin iyul ayında baş verən Tovuz hadisələrindən sonra, Adil də, hər kəsin sevimlisi olan general-mayor Polad Həşimovun və digər zabitlərin həlak olmasından sarsılır. O, bütün arzu və xəyallarının üstündən xətt çəkərək, tezliklə ön cəbhədə olmaq, düşmənin layiqli cavabını vermək istəyir. Və səbirsizliklə o günü gözləyir.
21 Sentyabr 2020-ci ildə Adil Rzayevə Hərbi Komissarlıqdan "Çağırış” vərəqəsi gəlir və o, çox böyük həvəslə çağırışa səs verir. Vətən sevdalı oğul elə həmin gün Qusar rayonunda yerləşən "N” saylı hərbi hissəyə təlimlərə göndərilir.
27 Sentyabr 2020-ci ildə II Qarabağ müharibəsi başlanan gün A,Rzayev Ağcabədi rayonunda yeləşən hərbi hissəyə, 2-3 gündən sonra isə ön cəbhəyə - Füzuli rayonuna göndərilir.
Oktyabrın 4-də Adil evlərinə zəng edir. Qardaşı ilə danışanda fəxr ilə Füzuli istiqamətində gedən döyüşlərdə iştirak edəcəyini bildirir. Elə oktyabr ayının 4-də Füzuli şəhəri uğrunda gedən döyüşlərdə iştirak edən gənc əsgər itkin düşür.
Oktyabrın 4-dən axtarışda olan gənc döyüşçü haqqında xəbər yalnız noyabrın 29-da çıxır.
Azərbaycan Ordusunun cəsur döyüşçüsü Adil Rzayev 30 noyabr 2020-ci il tarixdə Sumqayıt Şəhidlər Xiyabanında dəfn olunur.
44 günlük Vətən müharibəsi tarixinə adını Qızıl hərflərlə yazan qəhrəmanımız bütün arzularının üstündən xətt çəkməyə hazır oldu. O arzular ki, igidimiz xoşbəxt bir həyata imza atacaqdı. O arzular ki, gələcək həyatını daha gözəl, mənalı, rangarəng edəcəkdi. O arzular ki, onu "ATA”, anasını "NƏNƏ”... edəcəkdi...
Hər dəfə "Ölmək üçün yox, öldürmək üçün gedirəm döyüşə!”deyən Adil, Vətən müharibəsində şücaəti ilə ŞƏHİD adını qazanaraq, təkcə öz ailəsinin deyil, Azərbaycan xalqının məğrur QƏHRƏMANına cevrildi, ürəklərdə məskən saldı!!!
Azərbaycanın Silahlı Qüvvələrinin mətin, qorxmaz, igid döyüşçüsü, 21 yaşlı gənc əsgəri Adil Akif oğlu Rzayev Vətən müharibəsində göstərdiyi şücaətə görə ölümündən sonra, Azərbaycan Respublikasının prezidenti İlham Əliyevin müvafiq Sərəncamlarına əsasən, "Vətən uğrunda” və "Xocavəndin azad olunmasına görə” medalları ilətəltif edilib.
Ruhun şad olsun, Cənnətməkan Şəhidimiz!!!
Aygün Hacıyeva,
jurnalist, yazıçı-publisist
Xəbərdən istifadə edərkən istinad etmək vacibdir.
