"Sumqayıt şəhərinin eyniadlı komandasının ev oyunlarını keçirdiyi stadionda qaz borcunu ödəməli olan tərəf məhz komandanın özüdür".
Bu barədə Azərbaycan Futbol Federasiyaları Assosiasiyasının (AFFA) mətbuat katibi Elnur Məmmədli bildirib.
Elnur Məmmədlinin sözlərinə görə, Mehdi Hüseynzadə adına Sumqayıt şəhər stadionu "Sumqayıt" klubu tərəfindən birillik icarə əsasında götürüldüyündən borcu komanda ödəməlidir.
"Stadion Sumqayıt Şəhər İcra Hakimiyyətinin nəzdində olsa da, kluba birillik icarə əsasında oyunlarını keçirməsi üçün verilib. Belə olan halda, tərəflər arasında müqavilə imzalanır. Həmin müqavilədə isə stadionun "Azəriqaz"a borcu olduğu qeyd olunur. Klub rəhbərliyi bundan xəbərdar olduğu təqdirdə stadionu icarə əsasında götürürsə, borcu da ödəməlidir. Nizamnamənin qaydalarına görə ev sahibi komanda öz futbolçuları ilə yanaşı, rəqib klubun oyunçularını da isti su ilə təmin etməlidir. Belə olmayan təqdirdə AFFA İntizam Komitəsi komandanı hər oyunda 500 manat dəyərində cərimələyir", - deyə E.Məmmədli bildirib.
Qeyd edək ki, digər problem ondan ibarətdir ki, Belarusun "Dinamo Minsk" klubu UEFA Konfrans Liqasındakı ev oyunları məhz Sumqayıtda keçirəcək. Minsk təmsilçisi Şotlandiyanın "Harts" klubunu məhz Mehdi Hüseynzadə adına Sumqayıt şəhər stadionunda qəbul edəcək. Lakin belaruslular hələ ki, su problemindən xəbərsizdirlər. Əgər o zamana qədər məsələ həllini tapmasa, UEFA bu dəfə "Dinamo Minsk" klubunu cərimələyəcək.(Oxu.az)
Xəbərdən istifadə edərkən istinad etmək vacibdir.
