Tədris ili müddətində bir çox məktəblərdə Beynəlxalq Müəllimlər Günü, 8 Mart və digər bayram günləri ərəfəsində, o cümlədən "fond pulu" və digər adlarla pul yığımlarının hələ də davam etdiyi heç kəsə sirr deyil. Lakin cari ildə, deyəsən, bu kimi problemlər artıq təhsil ili başlamazdan öncə gündəmə gəlib. Sumqayıt şəhər 1 nömrəli tam orta məktəbin bir neçə valideyni məktəbdə şəhərin 70 illiyinə həsr olunmuş tədbirlər üçün onlardan pul yığıldığını iddia edirlər. Bununla bağlı sosial şəbəkələrdə də xəbərlər yayılıb. Şəhər sakini Qərib Məmmədov deyir ki, sözügedən məktəbdə hər sinifdən 200 manat pul verilməsi tələb olunur.
Valideynlərin şikayəti əsasında 1 nömrəli məktəblə əlaqə saxladıq. Məktəbin direktor əvəzi Kəmalə Hüseynova Xeberle.com-a açıqlamasında rəhbərlik etdiyi təhsil ocağında belə bir halın olmamasını bildirdi. K. Hüseynova yayılan məlumatların həqiqəti əks etdirmədiyini və bu kimi hallarla mübarizə aparıldığını qeyd etdi: "Bizim məktəbdə heç bir valideyndən şəhər tədbiri üçün pul tələb olunmayıb, oluna da bilməz".
Xədicə Səxavətqızı
Xeberle.com
Xəbərdən istifadə edərkən istinad etmək vacibdir.
