Bakının köhnə və yeni binalarına vurulan bəzəkli üzlüklər ilk baxışdan şəhərə yarışıq verir, hətta işıqlandırma sistemləri ilə göz oxşayır. Amma bu gözoxşayan yaraşığın bir saatın içində yüzlərlə insanın həyatını necə qaralda biləcəyini düşünəndə adam dəhşətə gəlir. Elə 2 il öncə Sumqayıtda Heydər Əliyev prospektində də bir bina beləcə yanmışdı. Həmin vaxt itki olmasa da,  binaya ciddi ziyan dəymişdi. Məsələ orasındadır ki hazırda bu cür üzlüklə üzlənmiş binalar Sumqayıtda daha çoxdur. Deməli hər an analoji hal Sumqayıtda da təkrarlana bilər. Necə ki, bu günlərdə Xətai rayonu, Zığ şossesində 9 mərtəbəli yaşayış binasında, eləcə də bu gün Azadlıq peospektində 16 mərtəbəli binada çoxsaylı ölümlə nəticələnən yanğın baş verdi.

Qeyd edək ki, binalara vurulan üzlük- penoplast Çin istehsalıdır. Penoplastın vətəni Çin sayılsa da, xəbərlərə görə, orada tikinti sahəsində penoplastdan istifadə olunmur. Yəqin məhz bu səbəbdən ki, bu kauçuk üzlüklər tezalışan materiallardan hazırlanır və buna görə də insanların həyatı üçün böyük təhlükə hesab olunur.

Azad İstehlakçılar Birliyinin sədri Eyyub Hüseynov deyir ki, penoplast kimyəvi maddələrdən hazırlanır və yananda ətrafa zəhərli dioksin qazı buraxır: "Bu qaz həddindən artıq təhlükəli, zəhərli qaz olmaqla bərabər atmosferin ozon qatını zədələyir və deşir. Bu cür materiallardan üzlüklər hazırlanması, yanğın təhlükəsi olan yerlərdə istifadə olunması düzgün deyil. Əgər istifadə olunursa, həmin yerdə maksimum yanğın təhlükəsizliyi təmin olunmalıdır. Bu biznes müəyyən dairələrin marağındadır. Çox təəssüflər olsun ki, biznes maraqları istehlakçıların hüquqlarından öndə durur.”

Texnika elmləri namizədi Rafiq Salahov da Xeberle.com-a təsdiqlədi ki, bu üzlüklər polimer tərkibli materiallardan hazırlandığından yanmağa meyllidir: "Estetik baxımdan yaxşı görünür. Amma polimerdən hazırlandığına görə yanmağa meyllidir. Paytaxtda çox yerlərə vurulub. Əgər materialda polimerlik, sintetiklik varsa, deməli ekologiyaya da təsiri var. Boya vurulmamışdan öncə bu material tez alışır. Yanan binada da qoruyucu qat çəkilməmişdi. Boyaq çəkəndə yanğına qarşı təsirləri azaldır, keyfiyyətini yaxşılaşdırır. Əgər material süni yolla alınırsa, əlbəttə ki, ekoloji baxımdan ziyanlıdır. Bakıda binalara vurulan üzlüklər inşaat materialı deyil, bu üzlüklər inşaat konstruksiyasıdır. Tələblərə görə, yaşayış binası üçün nəzərdə tutulmuş üzlüklər tullantılardan hazırlanmamalıdır. Amma bu üzlüklər radiasiyalıdır. Odur ki, belə üzlüklər yaşayış binaları üçün faydalı deyil.”

Ekspertin sözlərinə görə yaşayış binalarına yalnız təbii süxurlardan hazırlanan üzlüklər vurulmalıdır: "Üzlüklər əsasən iki formada - təbii süxurlardan və tullantılardan hazırlanır. Ümumiyyətlə, üzlük ətraf mühitə qarşı dözümlü olmalıdır. Təbii süxurlardan alınan üzlüklər keyfiyyətli olur və bütün tələblərə, yəni tibbi və ekoloji baxımdan tələblərə cavab verir. Binalara vurulan üzlüklər isə tullantılardan hazırlandığından insanlara və ətraf mühitə çox ziyan vurur.”

R.ZEYNALLI/Xeberle.com